யுஎஸ் ஏர்வேஸில் 1000 பேர் நீக்கம்!

வாஷிங்டன்: யுஎஸ் ஏர்வேஸ் நிறுவனத்தில் 200 பைலட்டுகள் உள்பட 1000 பணியாளர்கள் நீக்கப்படட்டுள்ளனர்.

அமெரிக்காவின் 'யுஎஸ் ஏர்வேஸ் நிறுவனம்' ஏற்கெனவே நஷ்டத்தில் இயங்கி வருகிறது. இந்நிலையில், நஷ்டத்தைச் சமாளிக்க முடியாமல் பணியாளர்களைக் குறைக்கும் வழக்கமான ஆயுதத்தைக் கையிலெடுத்துள்ளது.

200 பைலட்டுகள், 150 உதவி பைலட்டுகள், 600 விமான நிலைய ஊழியர்கள் என மொத்தம் 1000 பேரை வேலையிலிருந்து நீக்கியுள்ளதாக யுஎஸ் ஏர்வேஸ் இன்று அறிவித்துள்ளது.

தேவையற்ற மார்க்கங்களில் விமானங்கள் இயக்குவதையும் குறைத்துக் கொள்ளப் போவதாக அறிவித்துள்ள யுஎஸ் ஏர்வேஸ், வரும் நிதியாண்டில் நிறுவனத்தை மீண்டும் லாபத்துக்குத் திருப்ப வேண்டும் என்பதே ஒரே குறிக்கோள் என்று அறிவித்துள்ளது.

மூன்றாவது காலாண்டில் இந்த நிறுவனம் 80 மில்லியன் டாலர் நஷ்டத்தைச் சந்தித்துள்ளது.