தமிழ் அகதிகள் பிரச்சினை - கொழும்பு விரைகிறார் ஆஸி தூதர்

சிட்னி: இலங்கைத் தமிழர்கள் பெருமளவில் ஆஸ்திரேலியாவை நோக்கி வருவதைக் கட்டுப்படுத்தும் வகையில், ஆஸ்திரேலியாவிலிருந்து சிறப்புத் தூதர் ஒருவர் கொழும்பு விரைகிறார்.

முன்னாள் துணைத் தூதர் ஜான் மெக்கார்த்தி தூதராக அறிவிக்கப்பட்டுள்ளார். இதுகுறித்து ஆஸ்திரேலிய வெளியுறவு அமைச்சர் ஸ்டீபன் ஸ்மித் கூறுகையில், ஓரிரு நாட்களில் மெக்கார்த்தியை சந்தித்துப் பேசி இந்தப் பயணம் குறித்து விவாதிப்பேன்.

உள்நாட்டுப் போரின் முடிவுக்குப் பின்னர் இலங்கை எதிர்கொண்டுள்ள சவால்களில் படகுகளில் பெருமளவிலானோர் அகதிகளாக வெளியேறுவதும் ஒன்று என்பதை இலங்கை தரப்புக்குத் தெரிய வைப்போம். இதை சமாளிக்க தேவையான உதவிகளையும் இலங்கைக்கு செய்வோம். இதை மெக்கார்த்தி தனது பயணத்தின்போது வலியுறுத்துவார்.

இலங்கையிலிருந்து அந்த நாட்டு குடிமக்கள் பெருமளவில் வெளியேறுவதைத் தடுக்க இலங்கைக்குத் தேவையான அனைத்து உதவிகளையும் ஆஸ்திரேலியா செய்யும் என்றார் ஸ்டீபன்.