ஏர் இந்தியா: நிர்வாகிகளின் ஓசிப் பயணம், ஊக்கத் தொகை 'வெட்டு'!

டெல்லி: இனி ஏர் இந்தியா தலைமை நிர்வாகப் பொறுப்புகளுக்கு வர நிச்சயம் எல்லோருமே யோசிப்பார்கள். அந்த அளவு சலுகைகளைக் கட் பண்ணப் போகிறதாம் ஏர் இந்தியா நிர்வாகம்.

சேர்மன், நிர்வாக இயக்குநர் போன்ற உயர் பொறுப்பில் உள்ள அதிகாரிகள் மற்றும் அலுவலர்களின் இலவச விமான பயணங்கள், வெட்டியாகத் தரப்படும் ஊக்கத் தொகைகளை அடியோடு குறைக்க முடிவு செய்யப்பட்டுள்ளதாக தகவல்கள் தெரிவிக்கின்றன.

ஏர் இந்தியா தலைவராக பதவி வகிப்போருக்கும் அவரது குடும்பத்தினருக்கும் (எத்தனை பேர் இருந்தாலும்!) ஆயுள்காலம் முழுக்க இலவசப் பயணத்தை அளிக்கிறது ஏர் இந்தியா. தலைமை நிர்வாகியாக வருவோருக்கும் இந்தச் சலுகைகள் உண்டு. இவர்களின் மகள், மருமகன், பேரன், பேத்திகள் என எல்லோருக்கும் இந்த சலுகை உண்டு.

இந்தச் சலுகை, வகிக்கும் பதவிக்கேற்ப அதிகாரிகளுக்கு தாராளமாக வழங்கப்பட்டு வருகிறது. இதுவே பல கோடிகளை விழுங்குகிறது.

இதுதவிர, ஊக்கத்தொகை எனும் பெயரில் சம்பளத்துக்கும் அதிகமாகவே இந்த அதிகாரிகளுக்கு தரப்படுகி்றதாம். இதில்தான் முதலில் கை வைக்க வேண்டும் விமானப் போக்குவரத்து அமைச்சகமும் கூறியுள்ளதாம்.

ஏர் இந்தியாவில் பணியில் உள்ள 30 இயக்குநர்களுக்கு மாதந்தோறும் ஊக்கத் தொகையாக மட்டுமே ரூ 65000 முதல் 85 ஆயிரம் வரை தருகிறார்களாம்.

இப்படி இன்னும் பல சலுகைகளை அனுபவித்து வருகிறார்களாம் நிர்வாகத்தின் உயர் மட்டத்தில் உள்ளவர்கள். இவற்றைக் குறைத்தாலே கணிசமான சம்பள சுமை குறையும் என்கிறார்கள் விமானப் போக்குவரத்து அமைச்சகத்தினர்.

இப்போது உள்ள நெருக்கடியான சூழலைப் பயன்படுத்தி, இந்த சம்பள முறைகேடுகள், அனாவசிய சலுகைகளை சரிசெய்யும் முயற்சியில் இறங்கியுள்ளதாம் விமானப் போக்குவரத்துத் துறை.