வலுவான டிசிஎஸ்-டவ் கெமிக்கல்ஸ் கூட்டணி!
மும்பை: இந்தியாவின் முதல் நிலை ஐடி நிறுவனமான டிசிஎஸ் அமெரிக்காவின் டவ் கெமிக்கல்ஸுடன் இணைந்து தனது வர்த்தகத்தை விரிவாக்குகிறது. இதன் மூலம் புதிய வேலைவாய்ப்புகளை உருவாக்கத் திட்டமிட்டுள்ளன.
அமெரிக்காவின் மிச்சிகனில் உள்ள மிட்லேண்டில் இந்த வேலைவாய்ப்புகளை உருவாக்கப் போவதாக அறிவித்துள்ளன இந்நிறுவனங்கள்.
இதுகுறித்து மும்பை பங்குச் சந்தையில் விவரங்களை தாக்கல் செய்துள்ளது டாடா கன்சல்டன்ஸி நிறுவனம்.
இரு நிறுவனங்களின் கூட்டு செயல்பாட்டுக்காக மிச்சிகன் மிட்லேண்டில் மிகப் பெரிய அலுவலகம் கட்டப்படுகிறது. இந்த அலுவலகத்தில் 1250 பணியாளர்களுக்கு வேலைவாய்ப்பு வழங்கப்படும். புதிய ஒப்பந்தப்படி டவ் கெமிகல்ஸின் அனைத்து பணிகளிலும் டிசிஎஸ் துணை நிற்கும்.
டிசிஎஸ்ஸும் டவ் கெமிக்கல்ஸும் ஏற்கெனவே 2006ல் கூட்டு வர்த்தகத்தில் ஈடுபட்டன. இப்போது அந்த வர்த்தகத்தின் விரிவாக்கமாக இந்த புதிய முயற்சியில் இறங்கியுள்ளதாக டிசிஎஸ் அறிவித்துள்ளது.