ராப் டான்ஸில் கலக்கிய விளாடிமீர் புடின்!

மாஸ்கோ: ரஷ்ய பிரதமர் விளாடிமீர் புடின் சகலகலாவல்லவானாக மாறி வருகிறார். சமீபத்தில் மீன் பிடித்து கலக்கினார். இப்போது ராப் டான்ஸ் ஆடி அசத்தியுள்ளார். கூடவே பிரேக் டான்ஸையும் போட்டு பின்னியுள்ளார்.

மாஸ்கோவில் நடந்த இசை சானல் ஒன்றின் விருது வழங்கும் விழாவில் கலந்து கொண்ட புடின் திடீரென ராப் டான்ஸும், பிரேக் டான்ஸும் ஆடி கூட்டத்தினரை குஷிப்படுத்தினார்.

புடின் திடீரென இப்படி ஆடுவார் என யாரும் எதிர்பார்க்கவில்லை. ரொம்ப மோசம் என்று சொல்ல முடியாத அளவுக்கு இருந்தது புடினின் ஆட்டம்.

அந்த நிகழ்ச்சியில் கலந்து கொள்ள வந்திருந்த இளைஞர்கள், புடினின் ஆட்டத்தைப் பார்த்து ஆரவாரித்தனர்.

57 வயதான புடின் ஸ்போர்ட்ஸ் உடையில் வந்திருந்தார். புடின் மேடையில் ஆடியபோது அவருக்குப் பாதுகாப்பாக வந்த பாதுகாப்புப் படையினர் கூட்டத்திதனர் மத்தியில் கலந்து கண்காணிப்பை மேற்கொண்டனர்.

பின்னர் நிகழ்ச்சியில் பேசிய புடின், மது, போதை இரண்டையும் இளைஞர்கள் தொடக் கூடாது. அது அவர்களை மட்டுமல்லாமல் கலாச்சாரத்தையும் கெடுத்து விடும் என்று அட்வைஸ் கொடுத்தார்.

புடினின் இந்த செயலுக்கு விமர்சனங்கள் எழுந்துள்ளது. தனது செல்வாக்கைக் கூட்டிக் கொள்வதற்காக இவ்வாறு டான்ஸ் ஆடுகிறார் புடின் என்று கோமர்சன்ட் என்ற ரஷ்ய நாளிதழ் வர்ணித்துள்ளது.

புடினின் செல்வாக்கு தற்போதும் 66 சதவீதமாக உள்ளது குறிப்பிடத்தக்கது. வரும் 2012ம் ஆண்டு மீண்டும் அதிபர் பதவிக்கு புடின் போட்டியிடக் கூடும் என பெரும்பாலான ரஷ்யர்கள் நம்புகின்றனர்.

முன்னாள் கேஜிபி உளவாளியான புடினுக்கு விமானம் ஓட்டுவது, பனிச் சறுக்கு, நீர்மூழ்கிகளில் வசிப்பது, துப்பாககி சுடுதல், கராத்தே இவையெல்லாம் மிகவும் பிடித்தமானவை.