இந்தியாவை விட்டுவிட்டு சீனாவுடன் உறவு கிடையாது- அமெரிக்கா

வாஷிங்டன்: இந்தியாவை விட்டு விட்டு சீனா உள்பட எந்த நாட்டுடனும் அமெரிக்கா உறவு வைத்துக் கொள்ள முன்வராது என்று அமெரிக்கா தெளிவுபடுத்தியுள்ளது.

இதுகுறித்து அமெரிக்க அரசியல் விவகாரத்துறை இணை அமைச்சர் வில்லியம் பர்ன்ஸ் கூறுகையில், சீனாவுடன் நல்லுறவை ஏற்படுத்திக் கொள்ள அமெரிக்கா முனைந்துள்ளது. அதேசமயம், இந்தியாவை விட்டு விட்டு சீனாவுடன் உறவு என்று அதற்கு அர்த்தம் எடுத்துக் கொள்ளக் கூடாது என்றார்.

உலக விவகாரத்தில் ஆசியாவின் பங்கு குறித்த அதிபர் ஒபாமாவின் பேச்சில் இந்தியாவைக் குறிப்பிடாதது ஏன் என்ற கேள்விக்கு பர்ன்ஸ் பதிலளிக்கையில், அடுத்த வாரம் பிரதமர் மன்மோகன் சிங் வாஷிங்டன் வருகிறார். ஒபாமா அரசு பதவியேற்ற பின்னர் முதல் முறையாக மன்மோகன் சிங் அமெரிக்காவுக்கு வருகிறார். இதை மனதில் கொண்டுதான் அதிபரின் பேச்சு அமைந்திருந்தது.

பொது உலக விவகாரங்களில் சீனா உள்ளிட்ட பிற நாடுகளின் கருத்துக்களை அமெரிக்கா நாடும்.

இந்தியா, அமெரிக்கா இடையிலான அணு சக்தி ஒப்பந்தத்தின் மூலம் இரு நாடுகளிலும் உள்ள பல்வேறு நிறுவனங்கள் பெரும் பலன் அடைந்துள்ளன என்றார் பர்ன்ஸ்.