ஐரோப்பிய யூனியன் தலைவரான பெல்ஜியம் பிரதமர்

பிரஸ்ஸல்ஸ்: ஐரோப்பிய யூனியன் அமைப்பின் முழு நேரத் தலைவராக பெல்ஜியம் பிரதமர் ஹெர்மன் தேர்வு செய்யப்பட்டுள்ளார். வெளியுறவுக் கொள்கைத் தலைவராக கேத்தரின் ஆஷடன் தேர்ந்தெடுக்கப்பட்டார்.

27 உறுப்பினர்களைக் கொண்ட யூனியன் கூட்டத்தில் ஒரு மனதாக ஹெர்மன் தலைவராக தேர்ந்தெடுக்கப்பட்டார். டிசம்பர் 1ம் தேதி தனது பொறுப்பை அவர் ஏற்கவுள்ளார்.

62 வயதாகும் ஹெரமன், இளைஞராக இருந்தது முதல் தீவிர அரசியலில் ஈடுபட்டு வருபவர். இருப்பினும் கடந்த ஆண்டு டிசம்பர் மாதம்தான் இவர் பிரதமர் பதவியை ஏற்றார் என்பது குறிப்பிடத்தக்கது.

1988 முதல் 93 வரை கிறிஸ்தவ மக்கள் கட்சியின் தலைவராக இருந்தார். 1993 முதல் 99 வரை அமைச்சராக இருந்தார். பட்ஜெட் போடுவதில் இவர் மிகத் திறமையானவர். நிதி விவகாரங்களி்ல் நல்ல அனுபவம் கொண்டிருந்தாலும், வெளியுறவு விவகாரங்களில் இவருக்கு ஞானம் போதாது என்று கூறப்படுகிறது.

அதேபோல இங்கிலாந்து லேபர் கட்சியைச் சேர்ந்த கேத்தரின் ஆஷ்டன், வெளியுறவுக் கொள்கைப் பிரிவு தலைவராக தேர்ந்தெடுக்கப்பட்டுள்ளார்.

53 வயதாகும் இவர் கடந்த 2007ம் ஆண்டு இங்கிலாந்து நாடாளுமன்றத்தின் பிரபுக்கள் சபைக்கு நியமிக்கப்பட்டவர். பின்னர் இங்கிலாந்துக்கான ஐரோப்பிய ஆணையத்தின் ஐரோப்பிய கமிஷனராக நியமிக்கப்பட்டார்.

இங்கிலாந்தில் அதிகம் அறியப்படாத அரசியல்வாதிகளில் இவர் ஒருவர். வெளியுறவுக் கொள்கையில் பெரிய ஞானம் இல்லாதவர். அதேசமயம், வர்த்தக விவகாரங்களில் நிபுணத்துவம் பெற்றவர். பொருளாதாரத்தில் பட்டம் பெற்றவர்.

இப்படி இரு முக்கியப் பதவிகளை பெற்றுள்ள இரு தலைவர்களும், வெளியுறவு விவகாரங்களில் போதிய அனுபவம் இல்லாதவர்களாக தேர்வு செய்யப்பட்டிருப்பது சர்ச்சையைக் கிளப்பியுள்ளதாம் ஐரோப்பிய நாடுகளில்.