தமிழகத்திற்கு 6 லட்சம் இலவச கேஸ் இணைப்பு-டெல்லி விரையும் அமைச்சர் வேலு

சென்னை: திமுக அளித்த வாக்குறுதிப்படி தமிழக அரசு அமல்படுத்தி வரும் இலவச கேஸ் இணைப்புத் திட்டத்தின் கீழ் நடப்பாண்டுக்கான 6 லட்சம் இலவச இணைப்புகளை உடனடியாக ஒதுக்கக் கோரி மத்திய அரசிடம் நேரில் வலியுறுத்தவுள்ளது தமிழக அரசு.

தமிழக மக்களுக்குதிமுக அளித்த வாக்குறுதிகளில் ஒன்றுதான் இலவச கேஸ் இணைப்பு திட்டம். இந்தத் திட்டத்தின்படி இலவச கேஸ் இணைப்பு மற்றும் கேஸ் அடுப்புகளை தமிழக அரசு வழங்கி வருகிறது.

இந்தத் திட்டத்துக்காக நிதியாண்டுதோரும் 6 லட்சம் இணைப்புகள் வழங்கப்பட்டு வருகின்றன. ஆனால் நடப்பு ஆண்டுக்கு இதுவரை கேஸ் இணைப்புகள் வழங்கப்படவில்லை.

இதையடுத்து மத்திய பெட்ரோலியத்துறை அமைச்சர் முரளி தியோராவை நேரில் சந்தித்து இதுகுறித்து வலியுறுத்த தமிழக உணவுத்துறை அமைச்சர் எ.வ.வேலு தலைமையில் தமிழக அதிகாரிகள் நாளை மறு நாள் டெல்லி விரைகின்றனர்.

அப்போது இந்த நிதியாண்டுக்கான கேஸ் இணைப்புகளை வழங்கக் கோருவதோடு, இந்த சிலிண்டர்களை ஒரு வருடத்திற்கு ஆறுமுறைதான் பயன்படுத்த வேண்டும் என்ற நிபந்தனையைத் தளர்த்தவும் தமிழக குழு கோரிக்கை வைக்கும் என்று தெரிகிறது.