பாக். பிரதமர் கிலானிக்கு தீவிரவாதி ஹெட்லி தூரத்து சொந்தம்?

டெல்லி: அமெரிக்காவில் கைது செய்யப்பட்டுள்ள தீவிரவாதி டேவிட் கோல்மேன் ஹெட்லி என்கிற தாவூத் கிலானி, பாகிஸ்தான் பிரதமர் யூசுப் ரஸா கிலானிக்கு தூரத்து சொந்தக்காரர் என்ற திடுக்கிடும் தகவல் வெளியாகியுள்ளது.

ஹெட்லியின் பாகிஸ்தான் தொடர்புகள் குறித்து தற்போது தீவிர புலனாய்வு நடந்து வருகிறது. இதில் பல திடுக்கிடும் தகவல்கள் கிடைத்துள்ளன.

அதில் முக்கியமானதாக, பாகிஸ்தான் பிரதமரும், ஹெட்லியும் தூரத்து உறவினர்கள் என்ற தகவல் கிடைத்துள்ளது.

ஹெட்லியின் தந்தை சயீத் சலீ்ம் கிலானி. இவர் பாகிஸ்தான் தூதரக அதிகாரியாக இருந்தவர். ரேடியோ பாகிஸ்தானின் இயக்குநராக இருந்தவர். இவருக்கும், பாகிஸ்தான் பிரதமருக்கும் ஒரே பூர்வீகம் என்று கண்டறியப்பட்டுள்ளது.

தாவூத் கிலானியாக பிறந்து அமெரிக்காவுக்கு வந்து வசிக்க ஆரம்பித்த பின்னர் தனது பெயரை டேவிட் கோல்மேன் ஹெட்லி என ஹெட்லி மாற்றிக் கொண்டார் என்பது நினைவிருக்கலாம்.

மேலும், ஹெட்லியின் ஒன்று விட்ட சகோதரான தன்யால் கிலானி, பாகிஸ்தான் பிரதமர் அலுவலகத்தில் பி.ஆர்.ஓ வாக இருப்பதாகவும் இன்னொரு தகவல் கிடைத்துள்ளது.