குஜராத்திலிருந்து நெல்லை வந்த 42 இலவச டிவிகள் மிஸ்ஸிங்!

தூத்துக்குடி: குஜராத்திலிருந்து நெல்லை மாவட்டத்தில் விநியோகிப்பதற்காக அனுப்பி வைக்கப்பட்ட அரசு இலவச டிவி பெட்டிகள் மாயமாகி விட்டன.

தமிழக அரசுக்காக பல்வேறு நிறுவனங்கள் இலவச டிவி பெட்டிகளை தயாரித்து விற்று வருகின்றன. இந்த டிவிகளை வாங்கி அரசு மக்களுக்குக் கொடுத்து வருகிறது.

இதேபோல, குஜராத்தை சேர்ந்த ஜுலஸ் எலக்ரே என்ற நிறுவனமும் அரசுக்காக டிவி தயாரித்து அனுப்பி வருகிறது.

இந்த நிறுவனத்தின் சார்பில் 810 இலவச டி.வி. பெட்டிகள் பாளையங்கோட்டைக்கு அனுப்பி வைக்கப்பட்டது. இவை குஜராத்தில் இருந்து தூத்துக்குடி துறைமுகத்திற்கு வந்த போது, அதிலிருந்த 42 டி.வி. பெட்டிகளைக் காணவில்லை.

அதிர்ச்சியடைந்த குஜராத் நிறுவனத்தின் அதிகாரி மகாத்மா, போலீசில் புகார் கொடுத்துள்ளார். போலீஸார் காணாமல் போன பெட்டிகள் குறித்து விசாரித்து வருகிறார்கள்.