பாக்.குக்கு பணம், ஆயுதம் மட்டுமே குறி-அமெரிக்கா

வாஷிங்டன்: பாகிஸ்தான் அரசு அமெரிக்காவுடனும், அதிபர் ஒபாமாவுடனும் நெருக்கமான உறவை ஏற்படுத்திக் கொள்வதில் அக்கறை காட்டாமல், பணம், ஆயுதம் ஆகியவற்றைப் பெறுவதிலேயே குறியாக இருப்பதாக ஜனநாயகக் கட்சி செனட்டர் ராபர்ட் மெனிடஸ் குற்றம் சாட்டியுள்ளார்.

இதுகுறித்து அமெரிக்க நாடாளுமன்றத்தின் செனட் சபை வெளியுறவு விவகாரக் கமிட்டி முன்பு அவர் பேசுகையில், பாகிஸ்தானுடன் நாம் எந்த வகையான பாதுகாப்பு ஒத்துழைப்பை வைத்திருக்கிறோம் என்று எனக்கு சரியாக புரியவில்லை. அவர்களுடன் பாதுகாப்பு உறவை பலப்படுத்த வேண்டும் என்று நாம் பேசிக் கொண்டிருக்கிறோம். ஆனால் அப்படிப்பட்ட உறவை அவர்கள் விரும்புவது போலவே தெரியவில்லை.

அவர்களுக்குத் தேவை பணம், நிறைய ஆயுதங்கள் மட்டுமே. அதேசமயம், நம்முடன் நெருங்கிய உறவை வைத்துக் கொள்ள அவர்கள் விரும்பவில்லை.

பாகிஸ்தானுக்கு நிபந்தனையற்ற ஆயுத உதவிகளை அமெரிக்க அரசு கொடுப்பதை நான் விரும்பவில்லை. அந்த கொள்கையை மாற்றிக் கொள்ள வேண்டும்.

ஆப்கானிஸ்தானில் நாம் படைகளைக் குவிக்க குவிக்க பாகிஸ்தானை அதிக அளவில் நம்பியிருக்கும் நிலை ஏற்படும் என நான் கருதுகிறேன்.

பாகிஸ்தானுக்கு எந்த உதவி அளி்ப்பதாக இருந்தாலும் அது நிபந்தனையுடன் கூடியதாகவே அமைய வேண்டும் என நான் கருதுகிறேன். இஸ்லாமாபாத் எந்த அளவுக்கு தனது பொறுப்பில் தீவிரமாக இருக்கிறது என்பதை கண்காணிக்க வேண்டும். தீவிரவாதத்திற்கு எதிரான போரில் அது எடுத்து வரும் நடவடிக்கைகளில் முன்னேற்றம் தெரிகிறதா என்பதை கண்காணிக்க வேண்டும் என்றார் மெனிடஸ்.

மெனிடஸ் தீவிர பாகி்ஸ்தான் எதிர்ப்பு ஜனநாயகக் கட்சி செனட்டர் என்பது குறிப்பிடத்தக்கது.