'பிபிஓக்களுக்கு தரப்படும் வரிச்சலுகை ரத்து செய்யப்பட வேண்டும்!'

மும்பை: புதிய நேர்முக வரித் திட்டத்தின்படி, அனைத்து பிபிஓ (BPO) க்களிடமிருந்தும் இனி வரி வசூலிக்கப்பட வேண்டும் என நிபுணர்கள் கருத்து தெரிவித்துள்ளனர்.

நேரடி வரி விதிப்பு முறையின் கீழ் இப்போது பிபிஓக்களுக்கு வரிவிலக்கு அளிக்கப்படுகிறது. ஆனால் இப்போது அமல்படுத்தவிருக்கும் புதிய நேரடி வரி விதிப்பின் கீழ் இனி பிபிஓக்களிடமிருந்தும் கட்டாயம் வரி வசூலிக்கப்பட வேண்டும் என்று சர்வதேச நிதியியல் சங்க இந்தியப் பிரிவு தலைவர் டி பி ஆஸ்வர் தெரிவித்துள்ளார்.

"காரணம், பிபிஓக்கள் உள்நாட்டிலும் வெளிநாட்டிலும் பெரும் லாபம் சம்பாதிக்கின்றன. உலகின் 30 நாடுகளுக்கும் மேல் பிபிஓக்களுக்கு வழக்கமான வரி விதிக்கப்பட்டு வருகிறது.

இந்திய வருமான வரிச் சட்டம் பிரிவு 10 ஏ-ன் கீழ் பிபிஓக்களுக்கு தரப்பட்டுள்ள வரிச்சலுகை ரத்து செய்யப்பட வேண்டும்.

இரட்டை வரிவிதிப்பிலிருந்து தப்பிக்க வேண்டுமானால் பிபிஓக்கள் அரசை அணுகி விளக்கம் கோரலாம். ஆனால் வரிச்சலுகை கேட்க முடியாது. புதிய சட்டம் அதை அனுமதிக்காது" என்றார்.