அமெரிக்காவின் முதல் 'லெஸ்பியன்' மேயர் தேர்வு!

ஹூஸ்டன்: அமெரிக்காவின் ஹூஸ்டன் நகர மேயராக ஓரினச் சேர்க்கையாளரான ஆனிஸ் பார்க்கர் என்ற பெண்மணி தேர்வு செய்யப்பட்டுள்ளார்.

தன்னை எதிர்த்துப் போட்டியிட்ட ஜீன் லாக்கியை அவர் வீழ்த்தினார். ஹூஸ்டன் நகரின் முதல் ஓரினச் சேர்க்கையாளர் மேயர் இவர் என்பது குறிப்பிடத்தக்கது.

பார்க்கருக்கு ஆதரவாக 53.62 சதவீத வாக்குகள் கிடைத்தன. இவரை எதிர்த்துப் போட்டியிட்ட ஜீன் லாக்கி கருப்பர் இனத்தவர் ஆவார். இத்தேர்தலில் அவர் வெற்றி பெற்றிருந்தால், ஹூஸ்டனின் 2வது கருப்பர் இன மேயர் என்ற பெருமை கிடைத்திருக்கும். லாக்கி ஒரு முன்னாள் அரசு வழக்கறிஞர் ஆவார்.

ஹூஸ்டன் மேயர் தேர்தல் சனிக்கிழமை நடந்தது. இந்தத் தேர்தலுக்கான பிரசாரம் படு சூடாக இருந்தது. ஓரினச் சேர்க்கையாளரான ஆனிஸ், தனக்கு ஆதரவாக ஓரினச் சேர்க்கையாளர்களை அணி திரட்டி ஆதரவு சேகரித்தார்.

பார்க்கர் திருமணமானவர் என்பது முக்கியமாக குறிப்பிடத்தக்கதாகும்.

தான் ஒரு லெஸ்பியன் என்பதை பகிரங்கமாக அறிவித்தவர் பார்க்கர். பார்க்கருக்கு ஆதரவாக கே அன்ட் லெஸ்பியன் நிதியமும் பிரசாரத்தில் ஈடுபட்டிருந்தது குறிப்பிடத்தக்கது.