புவிவெப்ப மாற்றம்: யு.எஸ்சுடன் மோதல் இல்லை-ஜெய்ராம்

கோபன்ஹேகன்: புவிவெப்ப மாற்றத் தடுப்பு குறுத்து இந்தியா உள்ளிட்ட வளரும் நாடுகளின் நிலையும், வளர்ந்த நாடுகளின் நிலையும் நிச்சயம் மாறுபாடாகவே உள்ளது. இருப்பினும் இதுதொடர்பாக அமெரிக்காவுடன் இந்தியாவுக்கு எந்த கருத்து மோதலும் கிடையாது என்று கூறியுள்ளார் மத்திய சுற்றுச்சூழல்துறை இணை அமைச்சர் ஜெய்ராம் ரமேஷ்.

கோபன்ஹேகன் புவிவெப்ப மாநாட்டில் கலந்து கொள்வதற்காக கோபன்ஹேகன் வந்துள்ளார் ரமேஷ். அங்கு செய்தியாளர்களிடம் அவர் பேசுகையில்,

இந்தியா உள்ளிட்ட வளரும் நாடுகளின் புவிவெப்ப மாற்றத் தடுப்பு குறித்த கருத்து, நிலைக்கும், 43 உறுப்பினர்களைக் கொண்ட சிறிய தீவு நாடுகளின் கூட்டமைப்பின் (AOSIS) நிலைப்பாட்டுக்கும் நிச்சயம் வேறுபாடு உள்ளது.

இந்தக் கூட்டமைப்பு கடந்த செப்டம்பர் மாதம் புவிவெப்ப மாற்றம் குறித்து நடத்திய மாநாட்டின் பிரகடனத்திற்கும், எங்களது நிலைக்கும் நிச்சயம் மாறுபாடு உண்டு.

அதேசமயம், இந்த விவகாரம் தொடர்பாக இந்தியாவுக்கும், அமெரிக்காவுக்கும் இடையே எந்தவிதமான கருத்து மோதலும் கிடையாது. இருப்பினும் சீனாவுக்கும், வளர்ந்த நாடுகளுக்கும் இடையில்தான் கருத்து மோதல்கள் உள்ளன. அதேபோல அமெரிக்காவுக்கும், ஐரோப்பிய யூனியனுக்கும் இடையில்தான் கருத்து பேதங்கள் உள்ளன. இந்தியா இந்த இரண்டிலுமே இல்லை என்றார் ரமேஷ்.