லைபீரியாவில் ஏற்பட்ட விபத்தில் அமைச்சர் வயலார் ரவி காயம்

டெல்லி: லைபீரியா நாட்டுக்குச் சென்றிருந்த மத்திய வெளிநாடு வாழ் இந்தியர் விவகாரத் துறை அமைச்சர் வயலார் ரவி அங்கு ஏற்பட்ட கார் விபத்தில் காயமடைந்தார்.

மத்திய வெளிநாடு வாழ் இந்தியர் விவகாரத்துறை அமைச்சர் வயலார் ரவி 9 நாள் ஆப்பிரிக்க பயணத்தை மேற்கொண்டுள்ளார்.

வியாழக்கிழமை, லைபீரியாவின் மான்ரோவியா நகருக்கு சென்றிருந்த வயலார் ரவி அங்கிருந்து நைஜீரியாவின் லாகோஸ் நகருக்குச் செல்வதற்காக விமான நிலையத்திற்குக் காரில் போய்க் கொண்டிருந்தார்.

அவருடன், ஐவரி கோஸ்ட்டுக்கான இந்தியத் தூதர் ஷம்மா ஜெயினும் உடன் சென்றிருந்தார்.

அப்போது வழியில் வேகமாக வந்த டாக்சி ஒன்று, அமைச்சர் சென்ற கார் மீது மோதி விட்டது. இதில் ரவி, ஜெயின் ஆகியோர் காயமடைந்தனர்.

இதையடுத்து உடனடியாக அவர்கள் அரசு மருத்துவமனைக்கு அழைத்துச் செல்லப்பட்டனர். அங்கு சிகிச்சை அளிக்கப்பட்டது. விபத்தில் சிக்கியதைத் தொடர்ந்து ரவியின் லாகோஸ் பயணம் ரத்து செய்யப்பட்டது.