ஐஐஎம் மாணவர் சேர்க்கை: இனி பிளஸ்டூ, 10ம் வகுப்பு மதிப்பெண்களும் சேர்ப்பு

பெங்களூர்: ஐஐஎம் எனப்படும் இந்திய நிர்வாகவியல் கழக படிப்புகளில் சேர விரும்பும் மாணவ, மாணவியரின் பத்தாம் வகுப்பு மற்றும் பிளஸ்டூ தேர்வு மதிப்பெண்களும் கணக்கில் சேர்க்கப்படும்.

தற்போது வெறும் நுழைவுத் தேர்வு மதிப்பெண்கள் மட்டுமே கணக்கில் எடுக்கப்படுகின்றன. இனிமேல் பத்து மற்றும் பிளஸ்டூ மதிப்பெண்களையும் சேர்க்கவுள்ளனர்.

அதன்படி மொத்தம் உள்ள 100 மதிப்பெண்களில் 75 சதவீத மதிப்பெண்கள் நுழைவுத் தேர்வு மதிப்பெண்களாக இருக்கும். மீதமுள்ள 25 சதவீதம் பத்து மற்றும் பிளஸ்டூவில் பெற்ற மதிப்பெண்களாக இருக்கும். மேலும் பணி அனுபவத்தையும் சேர்த்துள்ளனர்.

பத்து மற்றும் பிளஸ்டூவில், 95 சதவீத மதிப்பெண்களுக்கு மேல் பெற்றவர்களுக்கு முழுமையாக 10 மதிப்பெண்கள் கிடைக்கும். 85 முதல் 90 வரை பெற்றவர்களுக்கு 6 மதிப்பெண்களும், 80- 85 பெற்றவர்களுக்கு 4 மதிப்பெண்களும் கிடைக்கும். பணி அனுபவத்திற்கு 5 மதிப்பெண்கள் தரப்படும்.

இதன் மூலம் ஐஐஎம்மில் சேர வேண்டுமானால் பத்தாம் வகுப்பிலிருந்தே நல்ல மதிப்பெண்களை பெற்றாக வேண்டிய நிலை ஏற்பட்டுள்ளது.