உலகக் கோப்பை ஹாக்கி: இங்கிலாந்துடன் இன்று மோதல் - வெல்லுமா இந்தியா?

டெல்லி: அரை இறுதி வாய்ப்பை கிட்டத்தட்ட இழந்து விட்ட இந்தியா இன்று இங்கிலாந்தை சந்திக்கவுள்ளது உலகக் கோப்பை ஹாக்கிப் போட்டியில். இதில் வென்றால் அரை இறுதி வாய்ப்பு குறித்து கொஞ்சம் போல நாம் நம்பிக்கை கொள்ள முடியும். இல்லாவிட்டால் சுத்தமாக கதவுகள் இழுத்து மூடப்பட்டு விடும்.

உலகக் கோப்பை ஹாக்கிப் போட்டியி்ல் இந்தியா இதுவரை 3 போட்டிகளில் ஆடியுள்ளது. இதில் முதல் போட்டியில் மட்டும் பாகிஸ்தானை வென்றது. 2வது போட்டியில் ஆஸ்திரேலியாவிடமும், 3வது போட்டியில் ஸ்பெயினிடமும் தோல்வி கண்டது.

இன்று நான்காவது போட்டியில் இங்கிலாந்தைச் சந்திக்கிறது. வலுவான ஆஸ்திரேலியாவை வீழ்த்திய அணி இங்கிலாந்து. இன்றைய போட்டியில் இந்தியாவின் வெற்றி வாய்ப்பு குறித்து உறுதியாகச் சொல்லமுடியாத நிலைதான்.

இருந்தாலும் தொடர்ந்து 3வது தோல்வியைத் தழுவுவதை இந்தியா தவிர்க்க முயற்சிக்கும் என்று எதிர்பார்க்கப்படுகிறது.

2 போட்டிகளில் தோல்வியுற்றதால் இந்தியாவின் அரை இறுதி வாய்ப்பு ஏற்கனவே மங்கிப் போய் விட்டது. இன்று நடைபெறும் போட்டியிலும், பின்னர் நாளை நடைபெறும் தென் ஆப்பிரிக்காவுக்கு எதிரான போட்டியிலும் வென்றால் மட்டுமே அரை இறுதி குறித்து நம்மால் ஓரளவாவது நினைத்துப் பார்க்க முடியும்.

இந்தத் தொடரில் இங்கிலாந்து அணி அபாரமாக ஆடிக் கொண்டிருக்கிறது. எதிர்த்த அணிகளையெல்லாம் அது காலி செய்து விட்டு கம்பீரமாக நிற்கிறது. தென் ஆப்பிரிக்கா, ஆஸ்திரேலியா, பாகிஸ்தான் என சந்தித்த மூன்று அணிகளையும் புரட்டிப் போட்டு விட்டுள்ளது.

9 புள்ளிகளுடன் முதலிடத்தில் உள்ளது இங்கிலாந்து. இந்தியாவோ 3 புள்ளிகளுடன் 4வது இடத்தில் இருக்கிறது.

இன்றைய போட்டியிலும், நாளைய போட்டியிலும் இந்தியா வென்றாலும் கூட, மீதமுள்ள அணிகள் பெறும் வெற்றி, தோல்விகளை வைத்துத்தான் இந்தியாவால் அரை இறுதிக்கு முன்னேற முடியுமா என்பதை கணிக்க முடியும். அப்படி ஒரு இக்கட்டான நிலை இந்தியாவுக்கு.

இந்தியா இன்று வெல்லுமா, தொடர் தோல்வி என்ற அவப்பெயரை தடுக்குமா என்பதை இன்று இரவு காணலாம்.