2011 சென்சஸில் சாதிவாரி கணக்கெடுப்பு இல்லை - பிள்ளை

டெல்லி: சாதி அடிப்படையில் மக்கள் தொகை கணக்கெடுப்பு நடத்தப்படாது என மத்திய உள்துறை செயலாளர் ஜி.கே.பிள்ளை தெரிவித்துள்ளார்.

இந்தியாவில் கடந்த 1931ம் ஆண்டுக்கு பின் சாதி வாரியாக மக்கள் தொகை கணக்கெடுப்பு நடத்துவது நிறுத்தப்பட்டது.

மத்திய, மாநில அரசுகளின் கல்லூரி படிப்பு முதல் வேலை வாய்ப்பு வரை பல்வேறு தளங்களிலும் சாதி அடிப்படையிலான இடஒதுக்கீடு முறை அமல்படுத்தப்பட்டு வருகிறது.

ஆனால், மக்கள் தொகை கணக்கெடுப்பை சாதி அடிப்படையில் நடத்துவது தவிர்க்கப்பட்டு வருகிறது.

மக்கள் தொகையின் சாதிவாரியான புள்ளி விவரங்கள் இல்லாத காரணத்தால், இடஒதுக்கீடு முறையை அமல் படுத்துவதில் பல்வேறு சிக்கல்கள் நிலவுவதாக குற்றம்சாட்டப்பட்டு வருகிறது.

சாதி அடிப்படையில் இடஒதுக்கீடு வழங்கம் வரை, சாதி வாரி கணக்கெடுப்பையும் நடத்தியாக வேண்டும் என பல்வேறு கட்சிகள் வலியுறுத்தி வருகின்றன.

குறிப்பாக தமிழகத்தில் பாமக உட்பட லாலுவின் ராஷ்ட்ரிய ஜனதாதளம், ஐக்கிய ஜனதா தளம் உள்ளிட்ட கட்சிகள் வருகிற 2011 மக்கள் தொகை கணக்கெடுப்பின் போது சாதியை ஒரு அம்சமாக சேர்க்க வேண்டும் என வலியுறுத்தி வருகின்றன.

கடந்த 2001ம் ஆண்டுக்கும் பின்னர் 2011ம் ஆண்டுக்கான மக்கள்தொகை கணக்கெடுப்பு பணிகளுக்கான முன்னேற்பாடுகள் நாடு முழுவதும் தற்போது மும்முரமாக நடந்து வருகின்றன.

இந்நிலையில், 2011ம் ஆண்டு மக்கள் தொகை கணக்கெடுப்பில் சாதி அம்சம் இடம் பெறாது என மத்திய உள்துறை செயலாளர் ஜி.கே.பிள்ளை டெல்லியில் இன்று தெரிவித்துள்ளார்.