பெண்களுக்கு 50% இட ஒதுக்கீடு வழங்க வேண்டும் - உமாபாரதி

டெல்லி: நாடாளுமன்றம் மற்றும் சட்டமன்றங்களில் பெண்களுக்கு 50 சதவீத இடஒதுக்கீடு வழங்க வேண்டும் என்று பாரதிய ஜன சக்தித் தலைவர் உமாபாரதி கோரியுள்ளார்.

டெல்லியில் இன்று நிருபர்களுக்கு பேட்டி அளித்த உமாபாரதி, மகளிர் இடஒதுக்கீடு மசோதா குறித்து கூறுகையில்,

'பெண்களுக்கான இட ஒதுக்கீடு மசோதாவை கட்சி பாகுபாடு இல்லாமல் அனைவரும் ஒருமனதாக ஓட்டளித்து நிறைவேற்ற வேண்டும்.

இதில் கட்சிகளின் கொறடா உத்தரவு தேவையற்றது. எம்பி தனது தனிப்பட்ட உரிமையின் அடிப்படையில் ஒட்டளிக்க அனுமதிக்க வேண்டும்.

பெண்களுக்கு 33 சதவீத இட ஒதுக்கீடு என்பது போதுமானது அல்ல. இதை 50 சதவீதமாக உயர்த்த வேண்டும்.

அதில் தாழ்த்தப்பட்டோர், பிற்படுத்தப்பட்டோருக்கு உள் ஒதுக்கீடு கொண்டு வரலாம். இது தொடர்பாக நான் காங்கிரஸ் உள்பட அனைத்து கட்சி தலைவர்களையும் சந்தித்து பேச இருக்கிறேன்' என்றார்.