நீதிபதியின் கையெழுத்தை போட்டு மோசடி - நோட்டரி வக்கீல் கைது

கோவை: சிறுநீரக தான பத்திரத்தில் நீதிபதியின் கையெழுத்தை போலியாக போட்டு மோசடி செய்த வழக்கில் நோட்டரி வக்கீல் கைதானார். பெண் வக்கீல் உள்பட மேலும் 2 பேரை போலீசார் தேடி வருகிறார்கள்.

கோவை வடவள்ளி அம்மன்குளத்தை சேர்ந்தவர் ரவி (38). இவர் டாஸ்மாக் மதுபான கடையில் கூலி வேலை செய்து வருகிறார்.

அவரது 2 சிறுநீரகங்களும் முழுமையாக பாதிக்கப்பட்டதால், சிறுநீரக மாற்று அறுவை சிகிச்சை செய்ய டாக்டர்கள் பரிந்துரை செய்தனர். ரவியின் மனைவி விஜயலட்சுமி, கணவருக்காக தனது ஒரு சிறுநீரகத்தை தானம் செய்ய முன்வந்தார்.

சிறுநீரகம் தானம் செய்யும் நபர் நோட்டரி வக்கீல் முன்னிலையில் ஒப்புதல் அளித்து, மாஜிஸ்திரேட் தகுதியிலான நீதிபதி மூலம் பரிந்துரை செய்யப்பட வேண்டும்.

இதற்காக ரவி, வடவள்ளி பகுதியில் வசித்து வரும், முன்னாள் அரசு வக்கீல் சரோஜா என்பரை அணுகினார். தனக்கு தெரிந்த மற்றொரு நோட்டரி வக்கீலான தங்கவேல் மூலம் மாஜிஸ்திரேட் பரிந்துரையை பெற்று வழங்க முடியும் என்றும், இதற்கு பணம் செலவாகும் என்றும் கூறினார்.

இதைத்தொடர்ந்து வக்கீல் சரோஜா மூலம் நோட்டரி வக்கீல் தங்கவேலுவுக்கு, ரவி ரூ.23 ஆயிரம் வழங்கினார். இந்த பணத்தை பெற்றுக்கொண்டு தங்கவேலு தயாரித்துக் கொடுத்த பிரமாண பத்திரத்தை சிறுநீரக கண்காணிப்பு குழுவிடம் ரவி வழங்கினார்.
பிரமாண பத்திரத்தில் உடுமலை குற்றவியல் நடுவர்மன்ற நீதிபதி சுஜாதாவின் பரிந்துரையும், கையெழுத்தும் இருந்தது.

சிறுநீரக தான பத்திரத்தை, கோவை மருத்துவ கல்லூரி முதல்வர் டாக்டர் குமரன் தலைமையிலான மருத்துவ குழுவினர் ஆர்.டி.ஓ. மற்றும் போலீசாரின் உதவியுடன் ஆய்வு நடத்தியபோது உடுமலை நீதிபதி சுஜாதா இந்த பிரமாண பத்திரத்தில் கையெழுத்திடவில்லை என்று கண்டுபிடிக்கப்பட்டது.

இதனால் ரவிக்கு சிறுநீரக மாற்று அறுவை சிகிச்சை செய்யும் பரிந்துரை ரத்து செய்யப்பட்டது. இதனால் பாதிக்கப்பட்ட ரவி, போலீசில் புகார் மனு அளித்தார். இது குறித்து போலீசார் விசாரணை நடத்தினார்கள்.

விசாரணையில், நீதிபதி சுஜாதாவின் கையெழுத்தை போலியாக போட்டும், நீதிபதியின் முத்திரையை போலியாக தயாரித்தும் பிரமாண பத்திரத்தில் மோசடி செய்யப்பட்டு இருப்பது தெரியவந்தது.

இதைத்தொடர்ந்து நோட்டரி வக்கீல் தங்கவேலு கைது செய்யப்பட்டார். மேலும் பெண் வக்கீல் சரோஜா, மற்றொரு வக்கீல் ஆகியோரை போலீசார் தேடி வருகின்றனர்.