'மை நேம இஸ் கான்'-பால் தாக்கரே மீண்டும் தாக்கு
மும்பை: ஷாருக் கானின் 'மை நேம இஸ் கான்' படம் அப்பாவி முஸ்லீம் இளைஞர்களை இந்தியாவுக்கு எதிராக ஆயுத போராட்டத்தில் ஈடுபடத் தூண்டும் வகையில் இருப்பதாக சிவசேனா தலைவர் பால் தாக்கரே குற்றம் சாட்டியுள்ளார்.
இந்தப் படம் ரிலீஸ் ஆன போது அதை எதிர்த்து பெரும் போராட்டம் நடத்தினார் தாக்கரே. ஆனால், அவரது எதிர்ப்பையும் மீறி மகாராஷ்டிரத்திலும் இந்தப் படம் வெளியாகி ஓடிக் கொண்டுள்ளது.
இந் நிலையில் இன்று தனது கட்சியின் சாம்னா இதழில் பால் தாக்கரே எழுதியுள்ள கட்டுரையில்,
தீவிரவாதிகள் அண்மையில் அளித்துள்ள வாக்குமூலத்தில், அப்பாவி இளைஞர்களை மூளைச் சலவை செய்ய ஷாருக்கானின் மை நேம் இஸ் கான் படம் பயன்படுத்தப்பட்டதாக கூறியுள்ளனர்.
ஷாருக் கானின் மை நேம் இஸ் கான் படம் முஸ்லீம் இளைஞர்களை இந்தியாவுக்கு எதிராக ஆயுத போராட்டத்தில் ஈடுபட தூண்டுவது போல உள்ளது. எனவே இந்தப் படம் இந்தியாவுக்கு எதிரான அமைப்புகள் பயன்படுத்த தயாரிக்கப்பட்டதோ என்றும் சந்தேகம் வருகிறது.
இதுகுறித்து ஷாருக் கானும், படத் தயாரிப்பாளர் கரன் ஜோகரும் பதிலளிக்க வேண்டும். ஷாருக் கான் படம் வெளிவர பலத்த பாதுகாப்பு கொடுத்த மகாராஷ்டிர மாநில முதல்வர் அசோக் சவானும் விளக்கம் அளிக்க வேண்டும் என்று கூறியுள்ளார் பால் தாக்கரே.