பாகிஸ்தான் விளம்பரத்தில் இந்திய போலீஸ் 'லோகோ'!

இஸ்லாமாபாத்: பாகிஸ்தான் அரசு சார்பில் வெளியான பத்திரிகை விளம்பரத்தில் இந்திய போலீசாரின் 'லோகோ' இடம் பெற்றிருப்பது கடும் சர்ச்சையை ஏற்படுத்தி உள்ளது.

பாகிஸ்தானில் உள்ள பஞ்சாப் மாகாண காவல்துறை சார்பாக, கடந்த வெள்ளியன்று பத்திரிகை விளம்பரம் ஒன்று வெளியிடப்பட்டது.

ஆங்கில, உருது மொழி பத்திரிகைகளின் முதல் பக்கத்தில் வெளியான அந்த விளம்பரத்தில், தீவிரவாத தாக்குதல்கள் குறித்து விழிப்புணர்வுடன் இருக்குமாறு பொதுமக்களுக்கு வேண்டுகோள் விடுக்கும் வாசகங்கள் இடம் பெற்றன.

விளம்பரத்தின் அடிப்பகுதியில் பாகிஸ்தானில் உள்ள பஞ்சாப் மாகாண காவல்துறையின் சின்னத்திற்கு பதிலாக இந்தியாவில் உள்ள பஞ்சாப் மாநில போலீஸ் துறையின் சின்னம் இடம் பெற்றிருந்தது.

மேலும், அந்த 'லோகோ'வுக்கு அடுத்த வரியில் பஞ்சாப் போலீஸ்' என்ற வார்த்தைகளும் பளிச்சிட்டன.

பணியாளர்களின் கவனக் குறைவால், பாகிஸ்தானில் உள்ள பஞ்சாப் போலீசுக்கு பதிலாக இந்தியாவின் பஞ்சாப் போலீஸ் லோகோ வைக்கப்பட்டிருந்தது பெரும் சர்ச்சையை ஏற்படுத்தியது.

பாகிஸ்தானில் உள்ள பஞ்சாப் மாகாண காவல்துறை டிஜிபி தாரிக் சலீம், தவறுக்கு விளம்பர நிறுவனமே காரணம் என குற்றஞ்சாட்டி உள்ளார்.

முன்னதாக, கடந்த ஜனவரி மாதம் மத்திய அரசு வெளியிட்ட விளம்பரத்தில் பாகிஸ்தான் விமானப்படை தளபதி தன்வீர் முகமது அகமது படம் இடம் பெற்றது குறிப்பிடத்தக்கது.