2011 தமிழக சட்டசபை தேர்தலில் மகளிர் இடஒதுக்கீடு அமலாகுமா?

சென்னை: தமிழகத்தில் வரும் 2011 சட்டப்பேரவைத் தேர்தலில் மகளிருக்கான இடஒதுக்கீட்டை அமல்படுத்துவது சாத்தியமில்லை என்று தேர்தல் அதிகாரிகள் தெரிவித்துள்ளனர்.

மக்களவை, மாநில சட்டப்பேரவைகளில் மகளிருக்கு 33 சதவீத இடஒதுக்கீடு அளிக்கும் மசோதா ராஜ்யசபாவில் மார்ச் 9ம் தேதி நிறைவேற்றப்பட்டது.

இந்த மசோதாவை விரைவில் லோக்சபாவில் நிறைவேற்ற காங்கிரஸ் மும்முரமாக முயன்று வருகிறது.

இந்த மசோதா வெற்றிகரமா நிறைவேற்றப்பட்டால், லோக்சபாவில் குறைந்தபட்சமாக பெண் உறுப்பினர்கள் 181 பேர் மற்றும் 28 மாநில சட்டப் பேரவைகளில் மொத்தம் 4,109 இடங்களில் 1,370 இடங்கள் பெண்களுக்கு கிடைக்கும்.

மகளிருக்கான இடஒதுக்கீடு அமலுக்கு வர பல்வேறு நடைமுறைகள் இருப்பதால், வரும் தமிழக சட்டப்பேரவைத் தேர்தலில் இது அமல்படுத்தப்படுமா என்ற கேள்வி எழுந்துள்ளது.

மகளிருக்கான இடஒதுக்கீட்டை முழுமையாக அமல்படுத்த 2 ஆண்டுகள் ஆகும் என்று மத்திய சட்ட அமைச்சர் வீரப்ப மொய்லி அண்மையில் தெரிவித்திருந்தார்.

மகளிர் இடஒதுக்கீடு சட்டம் அமலுக்கு வந்த பிறகு, எந்தெந்த தொகுதிகளை மகளிருக்கு ஒதுக்கலாம் என்பது குறித்து தீர்மானிக்க குழு அமைக்கப்படும்.

மகளிருக்கான தொகுதிகளை எந்த அடிப்படையில் ஒதுக்குவது என்பது உள்ளிட்ட விஷயங்களை இந்தக் குழு ஆராயும். இதுதொடர்பாக அரசியல் கட்சிகள் உள்ளிட்ட அனைத்துத் தரப்பினரின் கருத்துகளும் கேட்டறியப்படும்.

அதன்பிறகே, மகளிருக்கு ஒதுக்க வேண்டிய தொகுதிகள் குறித்து குழு பரிந்துரை செய்யும்.

இதற்கு குறைந்தது 12 மாத கால அவகாசமாவது தேவைப்படும். எனவே வரும் 2011 சட்டப்பேரவைத் தேர்தலில் மகளிருக்கான இடஒதுக்கீட்டை அமல்படுத்துவது சாத்தியம் இல்லை என்று தேர்தல் அதிகாரிகள் தெரிவிக்கின்றனர்.