பாஜக தலைவரின் எடைக்கு எடை ரத்தம் கொடுத்த தொண்டர்கள்!

அகமதாபாத்: எடைக்கு எடை நாணயம் கொடுப்பது பழங்கதையாகி விட்டது குஜராத்தில். அங்கு பாஜக தலைவர் ஒருவரின் எடைக்கு எடை ரத்தம் கொடுத்து அசத்தியுள்ளனர் பாஜகவினர்.

குஜராத் மாநில பாஜக தலைவராகியுள்ளார் ஃபால்டு. இதையடுத்து வித்தியாசமான முறையில் தலைவரைக் கெளரவிக்க முடிவு செய்தனர் அவரது ஆதரவாளர்கள்.

வழக்கமாக எடைக்கு எடை நாணயங்கள், வாழைப்பழம் உள்ளிட்டவற்றை காணிக்கையாக கொடுப்பது வழக்கம். அதை மாற்றி தலைவரின் எடைக்கு எடை ரத்தத்தைக் கொடுத்து அதை தானமாக தர முடிவு செய்தனர் குஜராத் பாஜகவினர்.

அதன்படி பெரிய தராசில் ஃபால்டுவை உட்கார வைத்தனர். பின்னர் தராசின் மறு முனையில் தானமாக பெறப்பட்ட ரத்தம் அடங்கிய டின்களை வைத்தனர்.

ஃபால்டுவின் எடை 75 கிலோ. இதையடுத்து 75 லிட்டர் ரத்தத்தை வைத்தனர். பின்னர் அதை வதோதராவில் தானமாக அளிக்க கொண்டு சென்றனர்.

பின்னர் வழக்கம் போல நாணயங்களைப் போட்டும் எடைக்கு எடை சம்பிரதாயத்தை முடித்துக் கொண்டனர்.

தலைவர்களும், இதுபோன்ற தடபுடல்களும் வட இந்தியாவில் ஓய்வதாக இல்லை.

மத்தியப் பிரதேசத்தில் பாஜக எம்.பி. நரேந்திர சிங் டோமர் என்பவருக்கு நடந்த பாராட்டு விழாவில் துப்பாக்கியால் டுமீல் என சுட்டு அதிர வைத்தனர் பாஜகவினர். இதில் ஒரு பாஜக நிர்வாகி காயமடைந்து விட்டார்.

உ.பியிலோ மாயாவதிக்கு விழும் பண மாலைகள் ஓய்வதாக தெரியவில்லை. இதுவரை 3 பண மாலைகளைப் போட்டு அசத்தியுள்ளனர் பகுஜன் சமாஜ் கட்சியினர் என்பது குறிப்பிடத்தக்கது.