திமுக வேட்பாளரை ஆதரித்து கருணாநிதி இன்று பென்னாகரத்தில் பிரசாரம்

பென்னாகரம்: திமுக வேட்பாளர் இன்பசேகரனை ஆதரித்து முதல்வர் கருணாநிதி இன்று பென்னாகரத்தில் பேசுகிறார்.

பென்னாகரம் பிரசாரத்திற்கு முதலில் ரயிலில் செல்வதாக திட்டமிடப்பட்டிருந்தது. ஆனால் காரிலேயே பென்னாகரம் செல்ல முதல்வர் முடிவு செய்தார். இதன் மூலம் வழியெங்கும் மக்களைப் பார்க்க வாய்ப்பு கிடைக்கும் என்பதால், காரிலேயே பயணம் செய்ய முதல்வர் முடிவெடுத்தார்.

அதன்படி இன்று காலை 7 மணிக்கு முதல்வர் கருணாநிதி கார் பயணத்தைத் தொடங்கினார். கிருஷ்ணகிரிக்குச் செல்லும் முதல்வர் அங்கு கட்சி நிர்வாகிகளுடன் ஆலோசனை நடத்துகிறார். பின்னர் ஓய்வெடுக்கிறார்.

மாலையில், பென்னாகரம் புறப்பட்டுச் செல்கிறார். அண்ணா திடலில் நடைபெறும் பிரசாரக் கூட்டத்தில் கலந்து கொண்டு பேசுகிறார். தங்கபாலு, திருமாவளவன், சுதர்சனம், அப்துல் ரகுமான் எம்.பி, பூஜை ஜெகன் மூர்த்தி, பொன் குமார், பு.தா. இளங்கோவன், திருப்பூர் அல்தாப், வலசை ரவிச்சந்திரன் ஆகிய கூட்டணிக் கட்சிகளின் தலைவர்களும் கலந்து கொள்கின்றனர்.

பிரசாரக் கூட்டத்தை முடித்துக் கொண்டு இரவு கிருஷ்ணகிரியில் தங்கும் முதல்வர் நாளை காலை கார் மூலம் மீண்டும் சென்னைக்குப் பயணப்படுகிறார்.