ஏப்ரல் 7ல் திட்டக் கமிஷன் கூட்டம்- 6ம் தேதி டெல்லி செல்கிறார் கருணாநிதி

சென்னை: டெல்லியில் வருகிற ஏப்ரல் மாதம் 7ம் தேதி திட்டமிக் கமிஷன் கூட்டம் நடைபெறுகிறது. இதில் கலந்து கொள்வதற்காக முதல்வர் கருணாநிதி ஏப்ரல் 6ம் தேதி டெல்லி செல்கிறார்.

தமிழகத்திற்கான நிதி ஒதுக்கீடு தொடர்பான ஆலோசனைக் கூட்டம் டெல்லியில் ஏப்ரல் 7ம் தேதி நடைபெறுகிறது. இதில் முதல்வர் கருணாநிதி பங்கேற்கவுள்ளார். இதற்காக ஏப்ரல் 6ம் தேதி அவர் விமானம் மூலம் டெல்லி செல்கிறார்.

திட்டக் கமிஷன் கூட்டத்தை முடித்துக் கொண்டு 7ம் தேதி இரவே சென்னை திரும்புகிறார்.

முதல்வரின் பயணத்தின்போது காங்கிரஸ் தலைவர் சோனியா காந்தி, பிரதமர் மன்மோகன் சிங்கை அவர் சந்திக்கலாம் எனத் தெரிகிறது.

சோனியாவுடன் தயாநிதி மாறன் திடீர் சந்திப்பு

இந்த நிலையில், காங்கிரஸ் தலைவர் சோனியா காந்தியை, மத்திய அமைச்சர் தயாநிதி மாறன் திடீரென சந்தித்துப் பேசினார்.

மத்திய ஜவுளித்துறை அமைச்சராக உள்ள தயாநிதி மாறன் நேற்று திடீரென காங்கிரஸ் தலைவர் சோனியா காந்தியை அவரது வீட்டிற்குச் சென்று சந்தித்துப் பேசினார். இந்த சந்திப்புக்கான காரணம் தெரிவிக்கப்படவில்லை.

இதுகுறித்து காங்கிரஸ் வட்டாரத்திலும், திமுக தரப்பிலும் எதுவும் தெரிவிக்கப்படவில்லை. இருப்பினும் இந்த சந்திப்பு குறித்து பல்வேறு ஊகத் தகவல்கள் கிளம்பியுள்ளன.

முதல்வர் உத்தரவின் பேரில் சோனியாவை, தயாநிதி மாறன் சந்தித்தாரா அல்லது அவராகவே சந்தித்தாரா என்ற கேள்விகளும் எழுந்துள்ளன.