திமுக வெற்றிக்கு காரணம்: கி.வீரமணி கண்டுபிடிப்பு!

சென்னை: முதல்வர் கருணாநிதியின் பொற்கால ஆட்சியில் நிகழ்த்தப்படும் போற்றத்தகுந்த சாதனைகள் தான் எல்லா இடைத்தேர்தல்களிலும் வெற்றி கிடைப்பதற்கு காரணம் என்று திக தலைவர் கி.வீரமணி கூறியுள்ளார்.

நடந்து முடிந்த பென்னாகரம் இடைத்தேர்தலில் திமுக வேட்பாளர் இன்பசேகரன் வெற்றி பெற்றார். இதையொட்டி திமுகவுக்கு வாழ்த்து தெரிவித்து திராவிடர் கழக தலைவர் கி.வீரமணி அறிக்கை வெளியிட்டுள்ளார்.

அந்த அறிக்கையில், 'பென்னாகரம் தொகுதி மக்கள் திமுகவுக்கே பெருவாரியான வாக்குகளை அளித்து வெற்றி வாகை சூட வைத்ததற்கு முக்கிய காரணம் முதல்வர் கருணாநிதியின் பொற்கால ஆட்சியின் போற்றத் தகுந்த சாதனைகள் தான்.

நாளும் ஒரு சாதனை என்பது தான் திமுக ஆட்சி. கடந்த 4 ஆண்டுகளில் இதுவரை நடந்த எந்த இடைத்தேர்தல்களிலும் எதிர்க்கட்சியினர் எவரும் வெற்றி பெறாமைக்கு அதுவே காரணம்.

திமுக என்பது கற்கோட்டை, அது மற்ற கட்சிகளை போல சரியும் மணல் வீடு அல்ல. வாக்களித்த பெருமக்களுக்கு நன்றி" என்று குறிப்பிட்டுள்ளார்.