திட்டக் கமிஷன் கூட்டம் தள்ளிவைப்பு – கருணாநிதி பயணமும் ரத்து

சென்னை: டெல்லியில் வருகிற 7ம் தேதி நடைபெறவிருந்த திட்டக் கமிஷன் கூட்டம் தள்ளி வைக்கப்பட்டு விட்டது. இதையடுத்து முதல்வர் கருணாநிதியின் டெல்லி பயணமும் ரத்தாகியுள்ளது.

2010-11ம் நிதியாண்டுக்கான, தமிழக நிதி ஒதுக்கீடு குறித்து ஆய்வு செய்ய திட்டக் கமிஷனின் கூட்டம் 7ம் தேதி நடைபெறுவதாக இருந்தது. இதில் கலந்து கொண்டு திட்டக் கமிஷன் துணைத் தலைவர் அலுவாலியாவுடன் முதல்வர் கருணாநிதி ஆலோசனை செய்வதாகவும் இருந்தது.

இதற்காக அவர் 6ம் தேதி டெல்லி செல்லத் திட்டமிட்டிருந்தார். ஆனால் திட்டக் கமிஷன் கூட்டம் தற்போது தள்ளி வைக்கப்பட்டு விட்டது. இதனால் முதல்வர் கருணாநிதியின் டெல்லி பயணமும் ரத்தாகியுள்ளது.

இதற்கிடையே, அதே 7ம் தேதி டெல்லியில் பிரதமர் மன்மோகன் சிங் தலைமையில் விலைவாசி பிரச்சினை தொடர்பான முதல்வர்கள் கூட்டம் நடைபெறவுள்ளது. அதில் துணை முதல்வர் மு.க.ஸ்டாலின் கலந்து கொள்கிறார்.