புதுச்சேரி – ப.சிதம்பரத்தைக் கண்டித்து அதிமுக வெளிநடப்பு

புதுச்சேரி புதுச்சேரிக்கு வர வேண்டிய பல நலத் திட்டங்களையும், சிறப்பு பொருளாதார மண்டலத்தையும் மத்திய உள்துறை அமைச்சர் ப.சிதம்பரம் தடுத்து விட்டதாக கூறி அவரைக் கண்டித்த புதுச்சேரி சட்டசபையிலிருந்து அதிமுக உறுப்பினர்கள் வெளிநடப்பு செய்தனர்.

புதுச்சேரி சட்டசபையில் இன்று அதிமுக தலைவர் அன்பழகன் பேசுகையில், புதுச்சேரியில் சிறப்பு பொருளாதார மண்டலம் அமையவிருந்த்து. ஆனால் நேற்று முன்தினம் புதுச்சேரிக்கு வந்திருந்த ப.சிதம்பரம் அதை ரத்து செய்து விட்டார். இதேபோல மேலும் பல நலத் திட்டங்களையும் அவர் ரத்து செய்து விட்டார் என்றார்.

இதற்குப் பதிலளித்த முதல்வர் வைத்தியலிங்கம், உறுப்பினர் அன்பழகன் கற்பனையில் பேசுகிறார். புதுச்சேரி மாநிலத்திற்கு பல திட்டங்களையும், வழி காட்டுதல்களையும் ப.சிதம்பரம் கொடுத்துள்ளார் என்றார்.

இதை ஏற்காமல் தொடர்ந்து பேசினார் அன்பழகன். மேலும் ப.சிதம்பரத்தையும் கடுமையாக விமர்சித்தார். இதையடுத்து அவர் பேசியதை அவைக் குறிப்பிலிருந்து நீக்க சபாநாயகர் ராதாகிருஷ்ணன் உத்தரவிட்டார். மேலும் அன்பழகன் பேசவும் தடை விதித்தார்.

இதற்கு எதிர்ப்பு தெரிவித்து அதிமுக உறுப்பினர்கள் வெளிநடப்பு செய்து வெளியேறினர்.