டெல்லி மார்க்கெட் பகுதியில் பயங்கர தீ விபத்து

டெல்லி: மேற்கு டெல்லியில் உள்ள பழைய பிளாஸ்டிக் குடோனில் பயங்கர தீவிபத்து ஏற்பட்டுள்ளது.

இன்று அதிகாலை சுமார் நான்கு மணிக்கு ஏற்பட்ட இந்த தீ மளமளவென அருகில் உள்ள இடங்களுக்கு பரவியது.

இருபத்து நான்கு தீயணைப்பு வாகனங்கள், ஒன்றரை மணி நேரத்துக்கும் மேலாக கடுமையாக போராடி தீயை கட்டுக்குள் கொண்டுவந்தனர்.

டெல்லியின் முண்ட்கா பகுதியில் மேற்கு ஃபிரினி சாலையில் உள்ள பழைய பிளாஸ்டிக் பொருட்கள் குடோனில் ஏற்பட்ட இந்த தீ விபத்தால் காலை வேளையில் அப்பகுதியில் பதட்டம் நிலவியது.

கடந்த ஞாயிற்றுக் கிழமை இதே பகுதியில் பெரும் தீவிபத்து ஏற்பட்டு பல கோடி மதிப்பிலான பொருட்கள் நாசமாயின.

மீண்டும் இதே பகுதியில் இன்று தீவிபத்து ஏற்பட்டுள்ளது குறிப்பிடத்தக்கது.