மைக்ரோசாப்டின் கின் ஒன், கின் டூ!

சான் பிரான்ஸிஸ்கோ: ஆப்பிள் நிறுவனத்துக்குப் போட்டியாக தானும் செல்போன் சந்தைப் போட்டியில் குதித்துள்ளது மைக்ரோசாஃப்ட் நிறுவனம்!

ஆனால் இந்த செல்போனை மைக்ரோசாஃப்ட் நேரடியாகத் தயாரிக்கவில்லை. ஜப்பானின் ஷார்ப் நிறுவனம் தயாரித்துள்ளது. வோடபோன் நிறுவனத்துடன் கூட்டாக விற்பனைக்குக் கொண்டு வருகிறது மைக்ரோசாஃப்ட்.

கின் ஒன், கின் டூ என்ற பெயர்களில் இந்த செல்போன்கள் இப்போது அறிமுகப்படுத்தப்பட்டுள்ளன. ஆனாலும் கடைகளில் இன்னும் விற்பனைக்கு வரவில்லை. மே முதல் வாரத்தில் அமெரிக்காவில் விற்பனைக்கு கிடைக்குமாம். அதன் பிறகே ஆசிய நாடுகளில் விற்பனைக்கு வருகின்றன.

ஃபேஸ்புக், ட்விட்டர், மைஸ்பேஸ் போன்ற சமூக நெட்வொர்க் தளங்கள் இந்த போனில் கிடைக்கும். புகைப்படங்கள் மற்றும் வீடியோக்களை எளிதில் பகிர்ந்து கொள்ளலாம்.

விரைவில் மைக்ரோசாப்ட் நிறுவனம் தனது சொந்த பிராண்ட் செல்போன்களைத் தயாரிக்க உள்ளதாம். அதற்கு முன்னோட்டமே இந்த கின் ஒன், கின் டூ என்கிறார்கள் சந்தை வல்லுநர்கள்.