சானியா போஸ்டர்களை அகற்றிய பெங்களூர் பெட்ரோல் பங்க் ஊழியர்கள்

பெங்களூர்: சோயப் மாலிக்கை சானியா மிர்ஸா கல்யாணம் செய்து கொண்டதால் அதிருப்தி அடைந்த பெங்களூர் பெட்ரோல் பங்க் ஊழியர்கள், பங்க்கில் வைத்திருந்த சானியாவின் போஸ்டர்களிலிருந்து அவரது முகத்தை மட்டும் வெட்டி அகற்றி விட்டனர்.

பெங்களூர் விமான நிலைய சாலையில், ஒரு பெட்ரோல் பங்க் உள்ளது. அங்குள்ள ஊழியர்கள் சானியா மிர்ஸாவின் தீவிர ரசிகர்கள். இதனால் சானியாவின் பிரமாண்ட போஸ்டர்களை அங்கு வைத்திருந்தனர். தற்போது அதில் உள்ள முகத்தை மட்டும் வெட்டியுள்ளனர் ஊழியர்கள்.

இதுகுறித்து அவர்கள் கூறுகையில், பாகிஸ்தான் கிரிக்கெட் வீரரை சானியா மணந்த்தால் நாங்கள் அதிருப்தி அடைந்தோம். இதனால்தான் போஸ்டர்களில் இருந்த சானியாவின் முகத்தை மட்டும் வெட்டி விட்டோம்.

முன்பு நாங்கள் சானியாவின் ரசிகர்களாக இருந்தோம். ஆனால் இனி அப்படி இருக்க மாட்டோம். பாகிஸ்தான் கிரிக்கெட் வீரரை மணந்தவருக்கு எப்படி ரசிகராக இருக்க முடியும் என்றனர்.

தற்போது அங்கு வைத்திருந்த போஸ்டர்களை பங்க்கின் உரிமையாளர் நீக்கி விட்டாராம்.