கிரீஸுக்கு 110 பில்லியன் யூரோ பெய்ல் அவுட்!

பெர்லின்: பொருளாதார நெருக்கடிக்குள்ளாகி தவிக்கும் கிரீஸ் நாட்டை மீட்டெடுக்க 16 யூரோ வலய நாடுகள் இணைந்து 110 பில்லியன் யூரோ மீட்புத் தொகையை கிரீஸுக்குத் தந்துள்ளன.

கிரீஸ் நாட்டை மீட்க மட்டுமல்லாமல், யூரோவின் மதிப்பை நிலைப்படுத்தவும் இந்த அவசர உதவியை அளித்துள்ளன.

பிரஸ்ஸல்ஸில் நடந்த சிறப்புக் கூட்டத்தில் கூடிய யூரோ வலய நாடுகளின் தலைவர்கள் இந்த மீட்பு உதவியை ஒருமனதாக அறிவித்துள்ளனர்.

இந்த நிதி உதவித் திட்டத்தை நேற்று அறிவித்த யூரோ குழும தலைவரும், லக்ஸம்பர்க்கின் பிரதமருமான ஜீன் கிளாட் ஜங்கர், "எவ்வளவு உதவித் தொகை தருவது என்பதை முடிவு செய்துவிட்டாலும் அதை எப்படி வழங்குவது, அதற்கான திட்டங்கள் குறித்து விரைவில் அனைத்து நாடுகளும் ஆலோசித்து விடையளிக்கும்" என்றார்.

இந்த திட்டப்படி கிரீஸுக்கு யூரோ வலய நாடுகள் உடனடியாக 80 பில்லியன் டாலர்களும், ஐஎம்எப் 30 பில்லியன் யூரோக்களையும் கடனாகத் தரவுள்ளன.

ஜெர்மனி மட்டும் 22.4 பில்லியன் யூரோவைத் தர சம்மதித்துள்ளது. பிரான்ஸ் 16.7 பில்லியன் யூரோக்களைத் தருகிறது.