மருத்துவ படிப்பிற்கான 'கட்-ஆப்' மார்க் 0.25 குறையும்!

சென்னை: எம்பிபிஎஸ் படிப்பில் சேருவதற்கான 'கட்-ஆப்' தகுதி மதிப்பெண் கடந்த ஆண்டைவிட இந்த ஆண்டு 0.25 குறைய வாய்ப்புள்ளது.

பிளஸ்-2 தேர்வு முடிவுகள் கடந்த 14ம் தேதி வெளியாயின. இதையடுத்து மருத்துவம், என்ஜினீயரிங் மற்றும் பிற படிப்புகளில் சேர மாணவர்கள் போட்டா போட்டி போட்டு வருகின்றனர்.

இந்த வருடம் பிளஸ்-2 கணிதத் தேர்வில் 200-க்கு 200 மார்க் பெற்றோர் எண்ணிக்கை கணிசமாக குறைந்துள்ளது. இதனால் என்ஜினீயரிங் படிப்பில் சேர 'கட்-ஆப்' மதிப்பெண் 0.5 முதல் 1.0 வரை குறையும் என்று தெரிகிறது.

அதே போல மருத்துவ படிப்பிற்கும் 'கட்-ஆப்' மார்க் 0.25 குறையும் என்று தெரிகிறது.

மருத்துவப் படிப்புக்கான 'கட்-ஆப்' மதிப்பெண்ணை பொறுத்தவரை கடந்த வருடத்தைவிட இந்த வருடம் ஒவ்வொரு 'கட்-ஆப்' மார்க்குக்கும் கூடுதலாக 20 மாணவர்கள் உள்ளனர்.

2 புதிய அரசு மருத்துவக் கல்லூரிகள் வந்துள்ளதால் தமிழகத்தில் அரசு மருத்துவக் கல்லூரிகளில் எம்பிபிஎஸ் இடங்கள் 170 அதிகரித்து மொத்தம் 1,653 இடங்கள் உள்ளன.

அதில் பொது பிரிவினருக்கான இடங்கள் 80 அதிகரிக்கப்பட்டு மொத்தம் 513 இடங்கள் ஒதுக்கப்பட்டுள்ளன.

பிற்படுத்தப்பட்டோருக்கு 438 இடங்களும், முஸ்லிம்களுக்கு 58 இடங்களும், மிகவும் பிற்பட்டோருக்கு 329 இடங்களும், ஆதிதிராவிடர்களுக்கு 247 இடங்களும், அருந்ததியினருக்கு 51 இடங்களும், பழங்குடியினருக்கு 17 இடங்களும் உள்ளன.

15,000 விண்ணப்பங்கள் வினியோகம்:

இந் நிலையில் எம்.பி.பி.எஸ்.,​​ பி.டி.எஸ்.​ ஆகிய மருத்துவப் படிப்புகளில் சேருவதற்காக கடந்த 4 தினங்களில் 15,000க்கும் அதிகமான விண்ணப்பங்கள் ​விற்றுத் தீர்ந்துள்ளன.

மே 31ம் தேதி வரை இந்த விண்ணப்பங்கள் வினியோகிக்கப்படும்.