பெங்களூரில் மேலும் 2 ஐடி பார்க் அமைக்கும் இன்ஃபோஸிஸ்!

பெங்களூர்: முன்னணி ஐடி நிறுவனம் இன்போஸிஸ் பெங்களூரில் புதிதாக இரு ஐடி பார்க்குகளை அமைக்கிறது.

இவை இரண்டும் மென்பொருள் மேம்பாட்டு மையங்களாக செயல்படும். இதற்கென ரூ.2,960 கோடி முதலீடு செய்வதாக அறிவித்துள்ளது.

இந்த மையங்களுக்கென ஏற்கெனவே 365 ஏக்கர் பரப்பளவு நிலத்தை பெங்களூர் புறநகரில் உள்ள சர்ஜாபூரில் கையகப்படுத்தியுள்ளது.

இது தவிர பெங்களூர் தேவனஹள்ளியில் புதிய விமான நிலையம் அருகே 40 ஏக்கரை ஒதுக்குமாறு கர்நாடக அரசுக்கு கோரிக்கை விடுத்துள்ளது.

இதில் சர்ஜாபூர் மையத்தில் 18,000 பேர் பணியாற்ற முடியும். தேவனஹள்ளி மையத்தில் 12,000 பேர் பணியாற்ற முடியும் அளவுக்கு கட்டடங்கள் கட்டப்படும்.

சர்ஜாபூரில் அமையவிருக்கும் புதிய மையம், இன்போஸிஸ் நிறுவனத்தின் இரண்டாவது பெரிய மென்பொருள் மேம்பாட்டு மையம் என்பது குறிப்பிடத்தக்கது. மைசூரில் உள்ள இன்போஸிஸ் மையம்தான் பரப்பளவில் நம்பர் ஒன்!.