உலகம் முழுவதும் வேகமாய் குறையும், குழந்தைகள் இறப்பு விகிதம்!

டெல்லி: இந்தியா உள்பட உலகம் முழுவதுமே குழந்தைகள் இறப்பு விகிதம் வேகமாக குறைய ஆரம்பித்துள்ளதாக ஆய்வில் தெரியவந்துள்ளது.

இந்தியாவில் குழந்தைகள் இறப்பு விகிதம் 4 முதல் 5 சதவீதம் வரை சரிந்துள்ளது.

வாஷிங்டன் பல்கலைக்கழகத்தின் Institute for Health Metrics and Evaluation (IHME) பிரிவு நடத்திய உலகளாவிய ஆய்வில் இந்த விவரங்கள் தெரியவந்துள்ளன. அதன் ஆய்வறிக்யை லேன்செட் இதழ் நேற்று வெளியிட்டுள்ளது. அதில் கூறப்பட்டுள்ளதாவது:

உலகம் முழுவதுமே குழந்தைகள் இறப்பு விகிதம் முன்பு நினைத்ததைவிட வேகமாகவே குறைந்து வருகிறது. 1990ம் ஆண்டில் உலகம் முழுவதும் 5 வயதுக்குட்பட்ட 1.2 கோடி குழந்தைகள் இறந்தனர்.

இது 2010ம் ஆண்டில் 77 லட்சமாகக் குறையும் என்று மதிப்பிடப்பட்டுள்ளது. இது 35 சதவீத சரிவாகம். இந்த 77 பேரில் 31 லட்சம் பேர் பிறந்து 28 நாட்களே ஆன குழந்தைகளாக இருப்பர், 23 லட்சம் பேர் 28 நாட்களைத் தாண்டிய குழந்தைகளாக இருப்பர், மேலும் 23 லட்சம் பேர் 1 முதல் 4 வயதுடைய குழந்தைகளாக இருப்பர்.

இந்தியாவில் குழந்தைகள் இறப்பு விகிதம் ஆண்டுதோறும் 4 முதல் 5 சதவீதம் வரை சரிந்து வருகிறது.

1970ம் ஆண்டு முதல் 2009ம் ஆண்டு வரை 187 நாடுகளில் பதிவான குழந்தைகள் இறப்புகள் குறித்த விவரங்களை சேகரித்து இந்த ஆய்வு மேற்கொள்ளப்பட்டது.

ஒட்டுமொத்தத்தில் ஆண்டுதோறும் உலகம் முழுவதும் குழந்தைகள் இறப்பு 2 சதவீதம் குறைந்து வருகிறது. இதை 2015ம் ஆண்டுக்குள் 4.4 சதவீதமாகக் குறைக்க ஐ.நா. இலக்கு நிர்ணயித்தள்ளது.

31 வளரும் நாடுகள் மிகச் சிறப்பான மருத்துவ வசதிகள் மூலம் குழந்தைகள் இறப்பை மிக அதிகமாக கட்டு்ப்படுத்தியுள்ளதாகவும் ஆய்வில் தெரியவந்துள்ளது.