9,000 ஊழியர்களை நீக்கும் ஹெச்பி!

நியூயார்க்: உலகின் முன்னணி ஐடி நிறுவனங்களுள் ஒன்றான ஹெவ்லெட் பாக்கார்டு (ஹெச்பி) தனது 9,000 பணியாளர்களை பணிநீக்கம் செய்வதாக அறிவித்துள்ளது.

இவர்களில் பெரும்பாலானோர் ஹெச்பி நிறுவனத்தின் டேடா சென்டர் பணியாளர்கள். தங்களின் 100க்கும் மேற்பட்ட டேடா சென்டர்கள், இணையதளப் பிரிவுகளில் பணியாற்றுபவர்களின் எண்ணிக்கையைக் குறைப்பதன் மூலம் சிக்கனத்தை மேற்கொள்ள ஹெச்பி முடிவு செய்திருப்பதாக தகவல்கள் தெரிவிக்கின்றன.

கடந்த அக்டோபர் மாத கணக்கின்படி ஹெச்பி நிறுவனத்தில் 3,04,000 பணியாளர்கள் இருந்தனர். இப்போது பணிநீக்கம் செய்யப்பட்டுள்ளோர் அளவு இதில் 3 சதவிகிதமாகும்.

அதேநேரம் நிறுவனத்தின் சர்வதேச விற்பனையை அதிகரிக்க 6,000 பேரை பிறகு வேலைக்கு அமர்த்தவிருப்பதாகவும் ஹெச்பி தெரிவித்துள்ளது. இவர்கள் அனைவரும் சம்பளம் குறைவாக உள்ள நாடுகளிலிருந்து தேர்ந்தெடுக்கப்பட்டு, ஹெச்பியின் பிற அலுவலகங்களுக்கு மாற்றப்படுவார்கள்.

இந்த வகை சிக்கன நடவடிக்கையை ஏற்கெனவே ஐபிஎம் மற்றும் ஹெச் பி நிறுவனங்கள் மேற்கொண்டுள்ளன. எக்கச்சக்க சம்பளம் பெறும் ஐரோப்பிய, அமெரிக்கப் பணியாளர்களை நீக்கிவிட்டு, அவர்களுக்கு பதில் குறைந்த சம்பளத்தில் இந்தியா மற்றும் இதர ஆசிய நாடுகளி்ல் ஆட்களைத் தேர்வு செய்து, தேவைப்படும் பகுதிக்கு அனுப்பி வந்துள்ளன.

மீண்டும் அதே டெக்னிக்கைப் பயன்படுத்த உள்ளது ஹெச்பி.