தொடர்ந்து 2வது நாளாக தங்கம் விலை குறைந்தது!

சென்னை: கடந்த சில நாட்களாக ஜெட் வேகத்தில் உயர்ந்த தங்கத்தின் விலை நேற்றும் இன்றும் சரிந்துள்ளது.

நேற்று முன்தினம் ஒரு பவுன் ரூ.13 ஆயிரத்து 952-க்கு விற்கப்பட்டது. நேற்று பவுனுக்கு ரூ.104 சரிந்து ரூ.13 ஆயிரத்து 848-க்கு விற்கப்பட்டது.

இன்று மேலும் ரூ.96 குறைந்தது. ஒரு பவுன் ரூ.13 ஆயிரத்து 752-க்கும், ஒரு கிராம் ரூ.1,719-க்கும் விற்கப்படுகிறது.

கடந்த 2 நாட்களில் தங்கம் பவுனுக்கு ரூ.200 குறைந்திருப்பதால் வாடிக்கையாளர்கள் மகிழ்ச்சி அடைந்துள்ளனர். சில நாட்களுக்கு முன்பு ரூ.14 ஆயிரத்தை கடந்த தங்கம் இப்போது சவரனுக்கு கிட்டத்தட்ட ரூ 300 வரை குறைந்துள்ளது.

தி நகரின் பிரபல நகை விற்பனையாளர் பிரின்ஸ் ஜோஸ் இதுகுறித்துக் கூறுகையில், "தங்கம் விலை மேலும் குறைந்தால் வியாபாரம் நன்றாக இருக்கும். மக்கள் நிறைய வருவார்கள். இனிவரும் நாட்களில் தங்கம் விலை மேலும் குறைய வாய்ப்புள்ளது என்றுதான் நினைக்கிறேன்" என்றார்.