வேலு தலைமையில் முதல்வர் கருணாநிதியை மீண்டும் சந்தித்தது பாமக குழு

சென்னை : முன்னாள் மத்திய அமைச்சர் வேலு தலைமையிலான பாமக குழுவினர் இன்று மீண்டும் முதல்வர் கருணாநிதியை சந்தித்துப் பேசினர்.

திமுக விடுத்துள்ள கூட்டணி அழைப்பை ஏற்கவும் முடியாமல், நிராகரிக்கவும் முடியாமல் பெரும் திணறல் திணறி வருகிறது பாமக. இதுதொடர்பாக ஏற்கனவே முதல்வர் கருணாநிதியை பாமக தலைவர் ஜி.கே.மணி தலைமையிலான எம்.எல்.ஏக்கள் குழு சந்தித்துப் பேசி ஆலோசனை நடத்தியது. ஆனாலும் அதில் உடன்பாடு ஏற்படவில்லை.

இந்த நிலையில் நேற்று பாமக நிர்வாகிகள், எம்.எல்.ஏக்களுடன் டாக்டர் ராமதாஸ் அவசர ஆலோசனை நடத்தினார். நாளை பாமக செயற்குழுக் கூட்டம் நடைபெறவுள்ளது.

இந்த நிலையில் இன்று மீண்டும் முதல்வர் கருணாநிதியை சந்தித்துள்ளது பாமக குழு.

முதல்வர் கருணாநிதியின் கோபாலபுரம் இல்லத்திற்குச் சென்ற வேலு தலைமையிலான குழுவினர் சந்தித்துப் பேசினர். குழுவில் ஜி.கே.மணி, பாமக எம்.எல்.ஏக்கள் வேல்முருகன், திருக்கச்சூர் ஆறுமுகம் ஆகியோரும் இடம் பெற்றிருந்தனர்.

இந்த ஆலோசனையின்போது என்ன விவாதிக்கப்பட்டது என்பது தெரிவிக்கப்படவில்லை. இருப்பினும் பாமக தரப்பில் இறுதியாக ஒரு கோரிக்கை வைக்கப்பட்டு அது கருணாநிதிக்கு தெரிவிக்கப்பட்டுள்ளதாக கூறப்படுகிறது. இதற்கு கருணாநிதி அளிக்கும் பதிலைப் பொறுத்து நாளை பாமக முடிவெடுக்கும் என எதிர்பார்க்கப்படுகிறது.