சென்னை-பிரபல நகைக்கடைகளில் திடீர் வருமானவரி சோதனை

சென்னை: சென்னையில் உள்ள இரண்டு பிரபல நகைக்கடைகளில் வருமான வரித்துறையினர் விடிய விடிய அதிரடி சோதனை நடத்தினர். இதில் பல முக்கிய ஆவணங்கள் சிக்கியுள்ளதாக தெரிகிறது.

சென்னை தியாகராய நகரில் உள்ள எல்.கே.எஸ். ஜூவல்லர்ஸ் மற்றும் பாத்திமா ஜூவல்லர்ஸ் நகைக் கடைகளில் வருமானவரித்துறையினர் நேற்று காலை திடீர் சோதனையில் இறங்கினர்.

இச் சோதனையின் போது, நகைகள் வாங்க பொதுமக்கள் கடைக்குள் அனுமதிக்கப்படவில்லை. இன்று அதிகாலை வரை சோதனை இடைவிடாமல் நடந்தது.

இந்த சோதனையின்போது முக்கிய ஆவணங்களை கைப்பற்றியுள்ள வருமானவரித் துறையினர் விசாரணை நடத்தி வருகின்றனர்.

மக்கள் நடமாட்டம் அதிகம் உள்ள தியாகராய நகரில் உள்ள இரண்டு பிரபலமான நகைக்கடைகளில் நடந்த வருமானவரி சோதனையால் அப்பகுதியில் பெரும் பரபரப்பு ஏற்பட்டது.