ராகுல் காந்தி பிறந்த நாள் ஆணழகன் போட்டி-பரிசளிக்கிறார் சரத் குமார்

சென்னை: ராகுல் காந்தி பிறந்த நாளையொட்டி காங்கிரஸ் கட்சியின் வட சென்னை கமிட்டி மற்றும் ஸ்கை ஜிம் நிறுவனம் இணைந்து நடத்தும் ஆணழகன் போட்டியில் சமத்துவ மக்கள் கட்சித் தலைவர் சரத்குமார் பங்கேற்றுப் பரிசளிக்கிறார்.

சென்னை, திருவள்ளூர், காஞ்சீபுரம் மாவட்டங்களுக்கு இடையேயான ஆணழகன் போட்டி இது. பழைய வண்ணாரப்பேட்டை தியாகராயர் கல்லூரியில் இந்த போட்டி இன்று தொடங்குகிறது.

மத்திய அமைச்சர் ஜி.கே.வாசன், சரத்குமார் ஆகியோர் போட்டியை தொடங்கி வைக்கிறார்கள். முதல் பரிசு பெறுபவருக்கு ரூ.1 லட்சம் பரிசளிக்கப்படுகிறது. இதை வாசனும்,சரத் குமாரும் இணைந்து வழங்கவுள்ளனர்.