காமசூத்ரா விளம்பரத்தில் நடித்த மாடல் அழகி விவேகா பாபாஜி மர்ம மரணம்
மும்பையின் பந்த்ரா பகுதியில் உள்ள அடுக்கு மாடிக்குடியிருப்பில் இவர் தங்கியிருந்தார். அங்கு அவரது இறந்த உடலை போலீஸார் கைப்பற்றியுள்ளனர். விவேகாவுக்கு வயது 37.
இவர் மிஸ் மொரீஷியஸ் பட்டம் வென்றவர் ஆவார். இவரது மரணம் குறித்து போலீஸார் தரப்பில் கூறுகையில், விவேகா பாபாஜி, தனது வீட்டில் மின் விசிறியில் தூக்குப் போட்டுத் தற்கொலை செய்து கொண்டுள்ளார்.
அக்கம் பக்கத்தில் வசிப்போர் வீட்டின் காலிங் பெல்லை அடித்தபோது கதவு திறக்கவில்லை. அப்போது விவேகா வீட்டுக்குள்ளிருந்து காஸ் வாசம் வந்துள்ளது. இதையடுத்து போலீஸாருக்குத் தகவல் கொடுத்தனர். போலீஸார் விரைந்து வந்து பார்த்தபோது மின்விசிறியில் பிணமாக தொங்கிக் கொண்டிருந்தார் விவேகா.
இது தற்கொலை போல தோன்றுகிறது. இருப்பினும் பிரேதப் பரிசோதனை அறிக்கைக்குப் பின்னரே எந்த முடிவுக்கும் வர முடியும்.
சமீபத்தில் அவருடைய காதலர் அவரை விட்டுப் பிரிந்து சென்றார். இதனால் மனம் உடைந்தநிலையில் விவேகமா இருந்ததாக அவரது குடும்பத்தினர் கூறுகின்றனர். விவேகா தனது மரணத்திற்கு முன்பு கடிதம் எதையும் எழுதி வைத்திருக்கவில்லை என்று தெரிவிக்கப்பட்டது.
காமசூத்ரா ஆணுறை விளம்பரங்கள் பலவற்றில் நடித்துள்ளார் விவேகா. மேலும் லிவ் இன் ஜீன்ஸ் விளம்பரத்திலும் நடித்துள்ளார். இரண்டு இந்திப் படங்களிலும் நடித்துள்ளார்.
90களில் மொரீஷியஸிலிருந்து மும்பைக்கு இடம் பெயர்ந்து வந்தார் விவேகா. மாடல் தொழிலில் ஈடுபடுவதற்காக வந்தவர் பின்னர் அதில் புகழ் பெறத் தொடங்கியதும், திரைப்படங்களிலும் நடிக்க ஆரம்பித்தார்.