அழகிரியுடன் போனில் பேசியது ஏன்- அதிமுக எதிர்க்கட்சித் தலைவரை வாரிய மதுரை மேயர்

மதுரை: தி.மு.க. மீது அபாண்டமாகவும், அவதூறாகவும் பழி போடும் நீங்கள், மத்திய அமைச்சர் மு.க.அழகிரியிடம் உங்கள் செல்போனில் இருந்து பேசாமல், வேறு ஒரு செல்போனில் இருந்து ஏன் பேசுகிறீர்கள்? என்று கேட்டு மதுரை மாநகராட்சி அதிமுக எதிர்க்கட்சித் தலைவர் சாலைமுத்துவை தர்மசங்கடத்தில் ஆழ்த்தினார் திமுகவைச் சேர்ந்த மேயர் தேன்மொழி கோபிநாதன்.

மதுரை மாநகராட்சியின் சாதாரணக் கூட்டம் மேயர் தேன்மொழி தலைமையில் நேற்று நடந்தது.

அப்போது நடந்த விவாதத்தின்போது திமுக மற்றும் அதிமுக கவுன்சிலர்களுக்கு இடையே கடும் அமளி ஏற்பட்டது. இதையடுத்து எதிர்க்கட்சித் தலைவர் சாலமுத்துவை ஒரு நாள் சஸ்பெண்ட் செய்து உத்தரவிட்டார் மேயர் தேன்மொழி.

முன்னதாக சாலைமுத்து பேசுகையில், கோவில் மாநகரம் தற்போது குப்பை நகரமாக மாறி உள்ளது. சுகாதார துறை உள்பட எந்த துறையிலும் அதிகாரிகள் இல்லை.

புதிதாக கட்டப்பட்டுள்ள சென்ட்ரல் மார்க்கெட்டில் தி.மு.க. மற்றும் காங்கிரஸ் கவுன்சிலர்களுக்கு கடைகள் ஒதுக்கப்பட்டு உள்ளது.

இது தவிர தி.மு.க. வட்ட செயலாளர்கள், பகுதி செயலாளர்களுக்கு எல்லாம் கடைகள் வழங்கப்பட்டு உள்ளன. இது தொடர்பாக மேயர் தேன்மொழி மீது கண்டன தீர்மானம் கொண்டு வருகிறேன் என்றார்.

அப்போது குறுக்கிட்ட மேயர் தேன்மொழி, இப்படி தி.மு.க. மீது அபாண்டமாகவும், அவதூறாகவும் பழி போடும் நீங்கள், மத்திய அமைச்சர் மு.க.அழகிரியிடம் உங்கள் செல்போனில் இருந்து பேசாமல், வேறு ஒரு செல்போனில் இருந்து ஏன் பேசுகிறீர்கள்? என்று கேட்டதும் அவையில் சலசலப்பு ஏற்பட்டது.

இதை மறுத்த சாலைமுத்து, மேயர் என் மீது கூறிய இந்த குற்றச்சாட்டை நிரூபித்து காட்ட வேண்டும். இல்லையென்றால் மேயர் மீது சட்டப்படி நடவடிக்கை எடுக்கப்படும். நான் மு.க.அழகிரியிடம் பேசவில்லை என்றார்.

இதையடுத்து இரு தரப்புக்கும் அமளி ஏற்பட்டது. அதன் பின்னரே சாலைமுத்துவை சஸ்பெண்ட் செய்து உத்தரவிட்டார் மேயர்.

இதையடுத்து அதிமுக கவுன்சிலர்கள் வெளிநடப்பு செய்வதாக கூறி வெளியேறினர்.அப்போது அவர்கள் மீது காகிதத்தில் சுருட்டிய நிலையில் வடையைத் தூக்கி சிலர் வீசினார்.

இதனால் அதிமுகவினர் கடுப்பானார்கள். வடையை வீசி அநாகரிமாக நடந்து கொள்ளாதீர்கள். சாலைமுத்து, மு.க.அழகிரியிடம் செல்போனில் பேசியதற்கு ஆதாரத்தை தர வேண்டும். அவர் மீது அபாண்டமான குற்றச்சாட்டை கூறி உள்ளீர்கள் என்று கூறியபடி வெளியேறினர்.