சென்னை ராயப்பேட்டை அமீர் மஹாலுக்கு வெடிகுண்டு மிரட்டல்

சென்னை : சென்னை ராயப்பேட்டை, ஜாம்பஜார் பகுதியில் உள்ள புகழ் பெற்ற அமீர் மஹாலுக்கு வெடிகுண்டு மிரட்டல் வந்துள்ளது.

பாரதி சாலையில் (பைகிராப்ட் சாலை) அமீர் மஹால் உள்ளது. இங்கு ஒரு கட்டுப்பாட்டு அறை உள்ளது. அங்கு ஒரு தொலைபேசி அழைப்பு வந்தது. அதில், பேசிய நபர் அமீர் மஹாலுக்கு குண்டு வைத்து விட்டோம். வெடிக்கப் போகிறது என்று கூறியுள்ளார்.

இதையடுத்து அண்ணா சாலை போலீஸாருக்குத் தகவல் போனது.அவர்கள் மோப்ப நாய்கள், வெடிகுண்டு நிபுணர்களுடன் விரைந்து வந்தனர். தீவிர சோதனை நடத்தியதில் குண்டு எதுவும் கிடைக்கவில்லை. இதையடுத்து புரளி என தெரிய வந்தது.

வந்த தொலைபேசி எண்ணை ஆராய்ந்தபோது அதே பகுதியில் உள்ள பொது தொலைபேசி அழைப்பகத்திலிருந்து வந்த எண் என்று தெரியவந்தது. இதையடுத்து போலீஸார் தீவிர விசாரணை நடத்தி வருகின்றனர்.