இன்போசிஸ் லாபம் 2.4% சரிவு: பங்கு விலை 3% சரிவு

மும்பை: இன்போசிஸ் நிறுவனத்தின் ஏப்ரல்-ஜூன் முதல் காலாண்டுக்கான லாபம் 2.4 சதவீதம் சரிவடைந்துள்ளது.

முதல் காலாண்டில் இந்த நிறுவனம் ரூ. 1,488 கோடி லாபம் ஈட்டியுள்ளது. இது கடந்த ஆண்டைவிட 2.4 சதவீதம் குறைவாகும்.

மேலும் கடந்த நிதியாண்டில் இந்த காலாண்டில் தான் இன்போசிஸ் மிகக் குறைந்த அளவாக 1,026 ஊழியர்களை மட்டுமே பணியில் சேர்த்துள்ளது.

ஐரோப்பிய பொருளாதாரத்தில் நிலவும் மந்தம், அந் நாடுகளில் இருந்து இன்போசிஸ் பிபிஓவுக்கு கிடைக்கும் ஆர்டர்கள் குறைந்து போனது ஆகியவையே இந்த சரிவுக்கு முக்கிய காரணமாகும்.

ஐரோப்பிய நாடுகளில் இருந்து இந்த நிறுவனத்துக்கு வரும் ஆர்டர்கள் 20 சதவீதம் அளவுக்குக் குறைந்துள்ளன. அதே நேரத்தில் ஊழியர்களி்ன் உதியம் 10 முதல் 20 சதவீதம் உயர்த்தபட்டதாலும் லாபம் குறைந்துள்ளதாக இன்போசிஸ் தெரிவித்துள்ளது.

இதனால் இந்திய பங்குச் சந்தையில் இந்நிறுவனத்தின் பங்கு விலை 3 சதவீதம் சரிந்து, அதாவது ரூ. 99.65 சரிவு ஏற்பட்டு, ரூ.1,488க்கு விற்பனையானது.

அதே போல அமெரிக்கப் பங்குச் சந்தையான நாஸ்டாக்கில் பட்டியலிடப்பட்டுள்ள இன்போசிஸ் பங்குகளின் விலையிலும் 3.44 சதவீதம் சரிவு ஏற்பட்டது.

பெரும் லாபம் ஈட்டப் போவதாக நினைத்து நேற்று முன் தினம் இந்த நிறுவனத்தின் பங்கு விலை அதிகபட்ச உயர்வைப் பெற்றது. ஆனால், நேற்று இந்த நிறுவனத்தின் காலாண்டு லாபம் குறைந்துபோனதாக அறிவிக்கப்பட்டதால் பங்கு விலை சரிந்தது.