11வது திட்ட காலத்தில் வளர்ச்சி விகிதம் 8.1 சதத்தைத் தாண்டும்-அலுவாலியா

டெல்லி: 11வது திட்ட காலத்தில் பொருளாதார வளர்ச்சி 8.1 சதவீதத்தைத் தாண்டலாம் என்று மத்திய திட்டக் கமிஷன் துணைத் தலைவர் எம்.எஸ். அலுவாலியா கூறியுள்ளார்.

பொருளாதார மீட்சி நடவடிக்கைகள் சிறந்த முறையில் இருப்பதால் வளர்ச்சி விகிதம் நல்ல உயர்வைக் காணும் வாய்ப்புகள் ஏற்பட்டிருப்பதாகவும் அலுவாலியா தெரிவித்தார்.

இதுகுறித்து அவர் கூறுகையில், 2007-12ம் ஆண்டு வரையிலான 11வது திட்ட காலத்தின் இறுதியில் நாட்டின் பொருளாதார வளர்ச்சி 8.1 சதவீதத்தைத் தாண்டும் வாய்ப்புகள் பிரகாசமாக உள்ளன. இதை விட அதிகமான வளர்ச்சியைக் கூட நாம் காண முடியும். கடந்த திட்ட காலத்தில் பொருளாதார வளர்ச்சி 7.7 சதவீதமாக இருந்தது.

இருப்பினும் திட்டமிட்டபடி 9 சதவீத இலக்கை அடைவது சற்று கடினமானதே. உலகப் பொருளாதார சீர்குலைவே இதற்குக் காரணம். அதேசமயம், 10வது திட்டக் காலத்தை விட கூடுதலான வளர்ச்சியை நாம் அடைவது பெரிய விஷயம் என்றார் அலுவாலியா.