மிக்-27 போர் விமானம் கிராமத்தில் விழுந்து விபத்து-விவசாயி பலி, 25 பேர் காயம்

ஜல்பைகுரி (மேற்கு வங்கம்): மேற்கு வங்க மாநிலம் ஜல்பைகுரி மாவட்டத்தில் விமானம் கிராமத்தின் மீது விழுந்து விபத்துக்குள்ளானது. இதில் தரையில் இருந்த ஒருவர் உயிரிழந்தார். 25 பேர் படுகாயமடைந்தனர். இவர்களில் ஐவரின் நிலை கவலைக்கிடமாக உள்ளது.

இன்று இந்த கோரச் சம்பவம் நடந்தது. போட்புட்டி என்ற கிராமத்தில், வயல் மீது மிக் விமானம் விழுந்து நொறுங்கியது. இதில் வயலில் வேலைசெய்து கொண்டிருந்த ஒருவர் கொல்லப்பட்டார். அவரது பெயர் பி.ராய். விவசாயியான அவர் நடுவுப் பணியில் ஈடுபட்டிருந்தபோது இந்த கோரம் நடந்தது.

25 பேர் படுகாயமடைந்தனர். அவர்களை மருத்துவமனைக்குக் கொண்டு சென்றுள்ளனர். அதில் 5 பேரின் நிலை கவலைக்கிடமாக இருப்பதாக தெரிவிக்கப்பட்டுள்ளது.

விமானத்தின் பைலட் சாகேத் வர்மா, பாராசூட் மூலம் குதித்து உயிர் தப்பினார். இருப்பினும் கீழே விழுந்தபோது அவர் காயமடைந்தார்.

இந்த விமானம் ஹஷிமாரா விமானப்படைத் தளத்திலிருந்து வழக்கமான பயிற்சிப் பயணத்தில் ஈடுபட்டிருந்தது. டேக் ஆப் ஆன சில நிமிடங்களிலேயே விபத்தில் சிக்கியது.