உணவுப் பணவீக்கம் 9.67 சதவீதமாக குறைந்தது
டெல்லி: நாட்டின் உணவுப் பணவீக்கம் இந்த ஆண்டிலேயே முதல்முறையாக ஒற்றை இலக்கத்திற்குக் குறைந்துள்ளது.
ஒருபக்கம் பணவீக்கம் குறைந்து கொண்டே வருகிறது. ஆனாலும் உணவுப் பொருட்களின் விலைவாசி மட்டும் குறையவே இல்லை. சாதாரண மக்களுக்கு இது பெரும் சுமையாக இருந்து வருகிறது. இந்த பிரச்சினையைத்தான் கடந்த 3 நாட்களாக நாடாளுமன்றத்தில் எழுப்பி எதிர்க்கட்சிகள் அமளி செய்து வருகின்றன.
இந்த நிலையில், நாட்டின் உணவுப் பணவீக்கம் இந்த ஆண்டிலேயே முதல் முறையாக ஒற்றை இலக்கத்திற்கு இறங்கி வந்துள்ளது.
ஜூலை 17ம் தேதியுடன் முடிவடைந்த வாரத்தில் 12.47 சதவீதத்திலிருந்து 2.80 சதவீதம் குறைந்து 9.67 சதவீதமாக குறைந்துள்ளது.
காய்கறிகள், குறிப்பாக உருளைக்கிழங்கு, வெங்காயம் ஆகியவற்றின் விலை குறைந்ததால் இந்த பண வீக்க குறைவு.
காய்கறிகளின் விலை 14.77 சதவீதம் அளவுக்கு குறைந்துள்ளது. உருளைக்கிழங்கு 46 சதவீதமும், வெங்காயம் 10சதவீத அளவும் விலை குறைந்துள்ளதாக அரசு கூறுகிறது.
இருப்பினும் தானிய வகைகள், பால், பழங்கள் ஆகியவற்றின் விலை முறையே 21.33 சதவீதம், 19.03, 12.14 சதவீதம் உயர்ந்துள்ளது.