ரூ.7,500 கோடி...400 ஏக்கரில் தீம் பார்க்-ரிலையன்ஸ் திட்டம்

லாஸ் எஞ்சலெஸ்: அனில் அம்பானியின் ரிலையன்ஸ் நிறுவனமும் ஹாலிவுட்டின் யுனிவர்சல் ஸ்டுடியோவும் இணைந்து ரூ. 7,500 கோடி செலவில் இந்தியாவில் தீம் பார்க் மற்றும் ரிசார்ட்டுகள் அமைக்க முடிவு செய்துள்ளன.

ரிலையன்சின் பிக் என்டெர்டெய்ன்மெண்ட் திரைப்படத் தயாரிப்பு நிறுவனம் இதற்காக யுனிவர்சல் ஸ்டுடியோவுடன் கைகோர்க்கவுள்ளது.

உலகின் முன்னணி திரைப்படத் தயாரிப்பு நிறுவனமான யுனிவர்சல் ஜெனரல் எலெக்ட்ரிக் நிறுவனத்தின் துணை அமைப்பு என்பது குறிப்பிடத்தக்கது.

இந்த தீம் பார்க் ஜாஸ், ஈடி, ஸ்பைடர்மேன், ஹாரி பாட்டர் உள்ளிட்ட மிகப் பிரபலமான திரைப்படங்களை அடிப்படையாகக் கொண்டு அமைக்கப்படும் என்று தெரிகிறது.

அமெரிக்காவில் லாஸ் எஞ்சலெஸ், ஓர்லாண்டோ மற்றும் ஜப்பானில் உள்ள யுனிவர்சல் நிறுவனத்தின் தீம் பார்க்குள் உலகப் பிரசித்தி பெற்றவையாகும். ரோலர்கோஸ்டர்கள், வாட்டர் பார்க்குகள், ஹோட்டல்கள், வர்த்தக வளாகங்கள், குழந்தைகள் பொழுதுபோக்கு அம்சங்கள் என பல விஷயங்களைக் கொண்ட இந்த பார்க்குகள் ஆண்டுதோறும் லட்சக்கணக்கானோரை ஈர்த்து வருகின்றன.

இதே போன்ற ஒரு பார்க்கை 400 ஏக்கர் பரப்பளவில் டெல்லி அல்லது மும்பையில் அமைக்க ரிலையன்ஸ் விரும்புவதாகத் தெரிகிறது. அத்தோடு நாடு முழுவதும் ரிசார்ட்டுகளையும் உருவாக்க திட்டமிட்டுள்ளது.