புதிய மின் கட்டண விகிதம்-ரீடிங்கை எப்படி கணக்கிடுவது?

சென்னை: புதிய மின் கட்டண விகிதத்தின் படி எப்படி மின்சார ரீடிங்கை கணக்கிடுவது என்பது குறித்து மின்வாரியம் விளக்கியுள்ளது.

தமிழகத்தில் ஆகஸ்ட் 1ம்தேதி முதல் புதிய மின் கட்டணம் அமலுக்கு வந்துள்ளது. இதையடுத்து நமது வீட்டின் ரீடிங்கை எப்படி கணக்கிடுவார்கள் என்ற குழப்பத்தில் மக்கள் உள்ளனர்.

இதுகுறித்து மின் வாரியம் விளக்கியுள்ளது. இதுகுறித்து மின்சார வாரிய அதிகாரி ஒருவர் விளக்குகையில்,

வீடுகளில் 2-வது மாதம் 20-ந்தேதியையொட்டி மின்சார மீட்டர் ரீடிங் எடுக்கப்பட்டு எத்தனை யூனிட் மின்சாரம் செலவு என்பது குறிக்கப்படுகிறது. இதன்படி, 600 யூனிட் மின்சாரத்தை ஒருவர் பயன்படுத்தினால் ஆகஸ்டு 1-ந் தேதிவரை 60 நாள் என்று கணக்கிட்டால் தினமும் 10 யூனிட் மின்சாரம் பயன்படுத்தியது தெரிய வரும்.

இதில் ஆகஸ்டு 1-ந்தேதிக்கு முன்பு 40 நாள் என்று எடுத்துக் கொள்ளப்பட்டு, இதற்கு பழைய கட்டணம் பெறப்படும். மீதம் உள்ள 20 நாட்களுக்கு 200 யூனிட் என்று கணக்கிட்டு கூடுதலாக 1 ரூபாய் கட்டணம் செலுத்த வேண்டும்.

600 யூனிட்டுக்கு அதிகமாக மின்சாரம் செலவு ஆனால், கூடுதல் யூனிட்டும் இதே முறைப்படி கணக்கிடப்பட்டு கூடுதல் கட்டணம் வசூலிக்கப்படும் என்றார்